Sekretarja e Përgjithshme e Këshillit të Bashkëpunimit Rajonal, Majlinda Bregu, deklaroi për emisionin “I Ftuari” në A2 CNN se nga data 1 korrik do të ulen tarifat “roaming” me vendet e Ballkanit, ndërsa “në një të ardhme të afërt” do të mund të flasim në celular “me çmime më të lira edhe me vendet e Bashkimit Evropian”.
Në një intervistë të zhvilluar në Sarajevë, kryeqytetin e Bosnje-Hercegovinës, aty ku ndodhet Këshilli i Bashkëpunimit Rajonal, Bregu u shpreh: “Ulja e tarifave të telefonisë celulare është një nga marrëveshjet që e gjeta të iniciuar dhe nga muaji janar kemi kryer të gjitha fazat e negocimit. Nënshkrimi i një marrëveshjeje që ul çmimet nuk është aq e lehtë. Pavarësisht se është vullnet politik nga kryeministrat, është e vështirë që të bindësh operatorët. Po koordinojmë marrëdhënien ndërmjet rregullatorëve dhe operatorëve të telefonisë, duke bërë të mundur reduktimin e tarifave të telefonatave dhe sms-ve nga data 1 korrik, duke krijuar një periudhë tranzicioni 2-vjeçare që do të ulë në mënyrë progresive tarifat. Në vitin 2021 kalojmë në sistemin 0 për të gjitha vendet e Ballkanit Perëndimor”.
Më tej, Bregu theksoi se “në momentin që u nënshkrua kjo marrëveshje, i hapëm derën mundësisë për të filluar negocimin për uljen e tarifave me vendet e Bashkimit Evropian”.
“Në një të ardhme të afërt do të flasim zero me Ballkanin dhe me çmime më të lira me vendet e BE-së”, deklaroi Bregu, e cila shtoi se po punohet “edhe për njohjet e diplomave dhe shpresoj shumë që në Samitin e Poznanit (4 korrik) të kemi një zhvillim”.
“Deri më sot, asnjë nga vendet nuk ka shprehur probleme politike për diplomat. Marrëdhënia Serbi-Kosovë nuk influencon në çuarjen përpara të gjithë axhendës rajonale. Jo se nuk ka efekte si çështje, por ne do të vazhdojmë që të çojmë përpara axhendat”, tha Bregu.
Sekretarja e Përgjithshme e Këshillit të Bashkëpunimit Rajonal nënvizoi më tej: “Kemi edhe një projekt shumë solid për turizmin. Jemi duke identifikuar rrugë të reja alternative për turizmin aventuror në Ballkan dhe për turizmin kulturor”. (A2 Televizion)
A2 CNN Livestream
MUND TE LEXONI GJITHASHTU
