Presidenti serb, Aleksandar Vuçiç, i dha yllit të Hollywood-it Johnny Depp medaljen e artë të vendit të tij “për merita të jashtëzakonshme në aktivitete publike e kulturore, sidomos në fushën e kinematografisë dhe promovimit të Serbisë në botë”.
Vuçiç dekoroi aktorin amerikan në Beograd, në Ditën e Republikës dhe gjithashtu dha medalje edhe për ish-ushtarë serbë të cilët kanë luftuar në Kosovë.
“Do të bëj gjithçka në dorën time që t’i qëndroj i vërtetë këtij vlerësimi, që bëhet për përkushtimin tim ndaj vendit tuaj”, i tha Depp Presidentit Vuçiç. “Këtu në Serbi kam marrë vetëm dhurata. Më duket se më është dhënë një jetë e re nga njerëzit, si Emir (Kusturica, regjisor). Jam gati për një fillim të ri dhe do të doja shumë që të ishte në Serbi, nëse më pranoni”.
Depp është përfshirë në disa projekte në Serbi në vitet e fundit, mes të cilëve edhe një serial i animuar, i quajtur “Puffins”, i cili është prodhuar në Serbi nga një kompani italiane, me mbështetjen edhe të Ministrisë serbe të Kulturës. Seriali i animuar me 168 episode tregon historinë e 4 zogjve të vegjël që ndeshen me një lopë deti. Episodet 5-minutëshe do të transmetohen në iTunes Store dhe Amazon Prime Video. (A2 Televizion)
A2 CNN Livestream
MUND TE LEXONI GJITHASHTU
