Me ardhjen e dozave të reja të vaksinave, duke e çuar në 3 milionë brenda këtij viti, Shqipëria do të jetë e përgatitur edhe për dozën e tretë. Kështu u shpreh ministrja e Shëndetësisë, Ogerta Manastirliu, gjatë mbledhjes së Komisionit për Ekonominë dhe Financat për diskutimin e Aktit Normativ dhe për miratimin e disa ndryshimeve në marrëveshjen për prodhimin dhe furnizimin nga Pfizer Export B.V. dhe Ministrisë së Shëndetësisë.
“Sigurisht, kjo është një kontratë e cila do të na japë mundësinë jo vetëm për të siguruar vazhdimësinë e vaksinimit për popullatën +18 vjeç, por është edhe pararendje, për çdo vendim të Komitetit të Vaksinimit dhe Komitetit të Imunizimit në raport me dozat e treta të cilat disa vende i kanë filluar. Kjo na jep një garanci më shumë në disponibilitetin e vaksinave”, tha Manastirliu.
Sipas Manastirliut, kontrata e re me kompaninë Pfizer, nuk ka asnjë ndryshim në çmim apo në kushtet të tjera.
“Përsa i përket marrëveshjes të cilën ne miratojmë sot, për këtë furnizim me 500,760 doza vaksine, qeveria ka miratuar edhe kryerjen e pagesës direkte për blerjen e këtyre vaksinave që i hap rrugë sigurisht edhe furnizimit tashmë me këto vaksina, sipas kalendarit të miratuar në këtë marrëveshje. Fakti që po sjellim një amendim të marrëveshjes së nënshkruar bëhet për arsye se kjo marrëveshje nuk ka ndryshime as kur flitet për ndryshime në çmim dhe për kushte të tjera të kontratës, por sepse vjen në një sasi plus”.
Ministrja e Shëndetësisë bëri me dije se nëpërmjet COVAX do të mbërrijnë edhe dy dërgesa të konsiderueshme të vaksinave brenda vitit.
“Nëpërmjet instrumentit të Covax tashmë jemi lajmëruar që në muajin tetor do të kemi edhe 188 mijë doza vaksine që mbërrijnë në Shqipëri nëpërmjet këtij instrumenti, ku Shqipëria ka parapaguar rreth 4 milionë dollarë. Ndërkohë që pritet që sërish nëpërmjet instrumentit Covax të mbërrijnë dhe rreth 370 mijë vaksina të cilat janë gjithashtu planifikuar për të mbërritur brenda këtij viti”, tha Manastirliu.
Manastirliu tha se përqindja e popullatës së vaksinuar me një dozë sot është 44%, ndërkohë që përqindja e popullatës së vaksinuar me dy doza është drejt 36% e popullatës. (A2 Televizion)
A2 CNN Livestream
MUND TE LEXONI GJITHASHTU
