Tregtia e jashtme është ngadalësuar ndjeshëm në katër e muajt e parë të vitit, si për eksportet po ashtu edhe për importet. Instituti i Statistikave ka regjistruar 20% më pak mallra të prodhuara në Shqipëri të transportuara drejt vendeve të tjera për muajin prill si pasojë e zhvlerësimit të euros dhe rënies së çmimeve në tregjet botërore të produkteve.
Vlera e eksporteve arriti në 34 miliardë lekë, duke pësuar ulje me 19.2 %, në krahasim me të njëjtën periudhë të vitit 2022. Në këtë vlerë tkurrjen më të fortë në eksporte e kanë materialet e ndërtimit dhe metalet ndjekur nga grupi i mineraleve, lëndët djegëse dhe energjia elektrike. Rënie ka pasur edhe për grupin e tekstileve dhe këpucëve.
Kreu i Shoqatës së Prodhuesve dhe Eksportuesve, Alban Zusi, thotë se kompanitë shqiptare kanë raportuar një humbje mbi 100 milionë euro deri më tani.
“Pjesa e munguar vetëm gjatë 2-3 muajve të fundit nga rënia e euros me 3.4% është e barabartë me afro 3 herë tatim fitimin që paguan një biznes eksportues. Nëse bizneset e kanë tatim fitimin 15% ajo çfarë u mungon bizneseve eksportuese është e barabartë sikur tatim fitimi i këtyre bizneseve të kishte vajtur 45%.”
Alban Zusi, Kreu i Shoqatës së Prodhuesve dhe Eksportuesve
Në 4 muaj, eksportet e mallrave llogariten në 156 miliardë lekë, në rënie me 3.4 %, ndërsa ulje të lehtë ka edhe tek importet e mallrave në një vlerë totale prej 283 miliardë lekësh.
Teksa parashikojnë një rënie të mëtejshme të euros, sipërmarrësit i druhen sezonit turistik për një rëndim të situatës si për eksportet po ashtu edhe për importet.
“Kur tregjet kanë funksionuar normalisht periudha e turizmit e ka ulur euron jo më shumë se 1-2 lekë. Kështu që nëse do të kishim një zhvlerësim me 10-20 lekë të vjetra edhe pranohet cdo zhvlerësim i mëtejshëm është i palogjikshëm, përsa kohë kemi tkurrje të bilancit tregtar nuk bën sens që ekonomia po rritet e po fuqizohet.”
Alban Zusi, Kreu i Shoqatës së Prodhuesve dhe Eksportuesve
Vendosja e një kursi këmbimi që nuk luhatet më shumë se 1% ose ndërmarrja e një politike kompensuese, janë masat që eksportuesit i kërkojnë qeverisë. Në 4 muajt e parë të vitit, Shqipëria eksportoi më pak drejt Italisë, Gjermanisë dhe Kinës, ndërsa tregtia rezulton në rritje me Greqinë, Kosovën dhe Spanjën. (A2 Televizion)
A2 CNN Livestream
MUND TE LEXONI GJITHASHTU
