Opozita e Bashkuar dërgoi në Këshillin Politik propozimin e saj për listat dhe koalicionet elektorale. Në dokumentin e firmosur nga Oerd Bylykbashi dhe Petrit Vasili kërkohet ruajtja e garimit në koalicione me listat e përbëra, siç është aktualisht, dhe hapja 100% e listave të kandidatëve.
“Është demonstrimi konstant i një vullneti politik për të ndërtuar konsensus”, tha Vasili.
Në draft, opozita sugjeron renditje alfabetike të kandidatëve në zgjedhje dhe Sekretari për Çështjet Zgjedhore në PD, Ivi Kaso, sqaron në A2 si përkthehet ky propozim krahasuar me atë të mazhorancës, që parashikon se është kryetari i partisë që përcakton renditjen e kandidatëve.
Socialistët lejojnë votën preferenciale, por kandidati duhet të grumbullojë vota, të paktën sa mesatarja e partisë së tij në zonë për të qenë fitues.
“Dallimi i madh i propozimit tonë me propozimin e mazhorancës ka të bëjë me renditjen e lirë të kandidatëve, sipas alfabetit, dhe më pas, pas përfundimit të numërimit të votave, rirenditjen e kandidatëve duke renditur të parin atë që ka marrë numrin më të lartë të votave parapëlqyese. Nuk do ketë asnjë prag për kandidatët për të qenë në Kuvend”, u shpreh Ivi Kaso.
Drafti i opozitës garanton ruajtjen e kuotës 30% për gjininë femërore, duke katapultuar në listën fituese kandidatet e kësaj gjinie edhe kur kanë më pak vota se kolegët meshkuj, deri në respektimin e kuotës minimale. Në draft, opozita përsërit kërkesën për t'iu drejtuar OSBE/ODIHR-it për çështjet që ndajnë palët, si ruajtja e koalicioneve të përbëra zgjedhore.
“Kërkon të imponojë mënyrën e koalicioneve, se i pranon, por, siç i pëlqen asaj me një listë të vetme”, thotë Vasili.
Opozita i lë dorë të lirë mazhorancës të përcaktojë se ku do të diskutohet drafti i saj, në Këshillin Politik apo Komisionin e Ligjeve.
“Mazhoranca të veprojë si mendon më mirë, për sa kohë të shihet me seriozitet propozimi ynë”, thotë Ivi Kaso.
Por, çfarë ndodh nëse mazhoranca voton ndryshimet në kod, në 1 tetor, siç ka paralajmëruar?
“Opozita ka shumë plane, jo vetëm një. Por, do të konsumojë deri në fund të gjitha instrumentet e konsensusit e të diskretitojë Rilindjen që ka frikë nga zgjedhjet”, thotë Vasili.
“Se çfarë bën mazhoranca në Kuvendin që e kontrollon është një çështje që nuk na përket”, thotë Kaso.
Më herët, opozita e bashkuar kishte refuzuar të paraqiste një draft të saj mbi reflektimin në Kod të ndryshimeve kushtetuese, me insistimin se ajo i qëndronte versionit të dakortësuar në marrëveshjen e 5 qershorit.
(A2 Televizion)
A2 CNN Livestream
MUND TE LEXONI GJITHASHTU
