Një sasi rekord e artikujve të falsifikuar me vlerë rreth 870 milionë paund është sekuestruar nga policia në Britaninë e Madhe.
Më shumë se 580 ton rroba, drogë, duhan, cigare elektronike dhe bombola me oksid azoti u gjetën në 207 kontejnerë transporti në Mançester.
Policia tha se aksioni "monumental" shënoi konfiskimin më të madh të mallrave “fake” në historinë e Mbretërisë së Bashkuar, më i madhi në Evropë në gati dy dekada dhe një nga më të mëdhenjtë globalisht.
U deshën dy javë dhe më shumë se 100 persona - polici, ekspertë markash dhe një kompani sigurie që të hapnin kontejnerët dhe të konstatonin veshjet dhe pajisjet e rreme.
Kontejnerët u gjetën në periferi të zonës Cheetham Hill, ndërsa tashmë po hetohet për burimin e mallrave false dhe kapjen e personave të përfshirë në këtë aktivitet.
Detektivi Christian Julien tha se operacioni Vulcan e vendosi policinë e Mançesterit "në tre vendet e para në mbarë botën për sekuestrim të sendeve të falsifikuara”.
"Kriminelët po fitojnë shuma të mëdha parash nga kjo tregti, e cila po derdhet për të nxitur më tej kriminalitetin, shfrytëzimin dhe mjerimin jo vetëm në Mançester, por në mbarë botën”, shtoi ai. (A2 Televizion)
A2 CNN Livestream
MUND TE LEXONI GJITHASHTU
