Manastirliu për infermierët drejt Italisë: Shembull i shkëlqyeshëm, do të kujdesemi për familjet tuaja

Ministrja e Shëndetësisë Ogerta Manastirliu përshëndeti 60 infermierët që do t’i drejtohen Italisë për të ndihmuar strukturat shëndetësore në vendin fqinj, tejet i goditur nga pandemia e koronavirusit.

Sipas ministres, kontingjenti i infermierëve i nisur sot, që vjen pas grupit të parë me 30 mjekë dhe infermierë, përfaqëson “një shembull të shkëlqyeshëm solidariteti për një vend mik si Italia”.

Manastirliu i kujtoi personelit shëndetësor se shteti do të kujdeset posaçërisht për familjet e tyre, duke njoftuar se grupi i parë i mjekëve dhe infermierëve “do të kthehet së shpejti”.

Në ceremoninë e përcjelljes së infermierëve ishte i pranishëm edhe ambasadori italian Fabrizio Bucci, i cili shprehu mirënjohjen e tij për ndihmën shqiptare. (A2 Televizion)