Këta njerëz kërkojnë që zëri i tyre të dëgjohet dhe thonë se nuk do të ndalen derisa kjo të ndodhë.
Ata janë viktima të dyfishta. Nga njëra anë, humbën vendet e punës. Nga ana tjetër, humbën aksesin në llogaritë e tyre bankare dhe, të paktën për momentin, kanë humbur të gjitha kursimet.
“Ne kemi punuar deri në ditën e fundit. Imagjinojeni, fjetëm dhe u zgjuam në mëngjes pa asgjë”, shprehet një protestuese.
Ata janë pjesë e 4 mijë deri në 6 mijë punonjësve që, përveçse ishin pjesë e grupit Vázquez, merrnin të gjithë pagën e tyre përmes Bueno Bank.
Por si ia dalin dhe si jetojnë?
“Do të doja të të thosha se si, por tani po mbijetojmë falë donacioneve, kuzhinave popullore që kemi organizuar dhe pakove ushqimore që po na japin njerëzit. Paraguajani është solidar. Paraguajani është ‘mbareté’, siç i themi ne, është i fortë dhe rezistent. Por, mbi të gjitha, tani ka njerëz që kanë punuar dhe kanë dhuruar empanada, që të tjerët të mund të hanë dhe të kenë diçka në stomak. Ka njerëz që ende nuk kanë ngrënë mëngjes”, thotë një protestuese.
Ueno Bank u mbyll në orët e para të së enjtes, duke shkaktuar një krizë nga e cila Paraguai ende nuk ka arritur të dalë. Kriza e aftësisë paguese të grupit, në qendër të të cilit qëndronte banka, preku gati 3 milionë njerëz, të cilët tani nuk mund të kenë akses në paratë e tyre. Mes tyre, grupi përvetësoi rreth 350 milionë nga fondi i përbashkët i pensioneve, ose afro 9 për qind të fondeve për pensionistët aktualë dhe ata të ardhshëm.
Për shkak të këtij skandali, ish-presidenti Santiago Peña u shkarkua dhe u arrestua. Deputetët e akuzuan për ndikim të paligjshëm, shkelje të besimit dhe administrim në interes të vetjak. Me votë unanime, ata e shpallën fajtor në këtë Kongres për keqmenaxhim të detyrës.
Sipas deputetes së opozitës, Joana Ortega, Peña favorizoi grupin e biznesit që zotëronte bankën. Për çfarë akuzohet ish-presidenti?
“Ekziston një bashkëpunim i qartë mes presidentit dhe asaj që po ndodh me këtë bankë. Prandaj besojmë se ky është vërtet gjyqi i parë politik në historinë e Paraguait ku ekzistojnë arsye konkrete që e përfshijnë personalisht presidentin. Një nga provat të çon deri në mars të vitit të kaluar. Ka shumë prova që e lidhin atë, madje drejtpërdrejt, me bankën.”
Peña vendosi të mos paraqitej në Kongres për t'u mbrojtur, ndonëse fillimisht kishte njoftuar në rrjetet sociale se do ta bënte këtë. Në vend të tij, u paraqit avokati Ricardo Preda, i cili kundërshton atë që e konsideron si mosrespektim të procesit të rregullt ligjor në këtë çështje.
“Ai më ka përcjellë se është i hapur për këtë proces. Është i qetë dhe i vetëdijshëm se duhet ta përballojë këtë situatë. Ky ishte në fund të fundit një goditje politike. U shfrytëzua një situatë që është padyshim e dhimbshme për shumë qytetarë paraguajanë. Fakti që kjo bankë falimentoi nuk do të thotë automatikisht se Santiago Peña ka përgjegjësi penale. Pikërisht këtë do të trajtojmë në mbrojtjen tonë.”
E sigurt është se në Paraguai ndoshta asgjë nuk do të jetë më si më parë pas kësaj krize. Ndërkohë, këta njerëz shpresojnë që ky makth të marrë fund sa më shpejt. (A2 Televizion)
A2 CNN Livestream
MUND TE LEXONI GJITHASHTU
