Meta i bashkohet protestës: Koha e demokracisë direkte po vjen

Kryetari i Parisë së Lirisë konfirmoi pjesëmarrjen në protestën e lajmëruar nga Sali Berisha më 12 nëntor. “Mbështetje totale për protestën madhështore të 12 Nëntorit! Shqiptarët më të bashkuar se kurrë drejt Referendumit dhe Primareve! Koha e Demokracisë direkte po vjen”, shkroi ish-presidenti në Facebook.

Protesta u njoftua nga Berisha pak orë pas takimit me Metën, ku të dy bashkë vendosën edhe mbi ecurinë e punës për zgjedhjet vendore të 14 majit. “Dua të informoj opinionin publik se opozita shqiptare, Partia Demokratike, Partia e Lirisë dhe forcat e tjera opozitare, nisin në datën 12 nëntor betejën e madhe kundër regjimit të urryer të narkoshtetit të parë dhe të vetëm në Evropë, regjimit të Edi Ramës. Në të katër anët e Shqipërisë po bien sirenat e urrejtjes ndaj monizmit të Ramës. Është krijuar gjendje katastrofale nga vjedhjet e papërmbajtura të pasurive publike, vjedhjet e buxheteve familjare nëpërmjet çmimeve të larta, pabarazisë absolute para ligjit që sundon në Shqipëri”, deklaroi Berisha.

Pas takimit me Berishën, Meta tha se Partia e Lirisë nuk do të dalë në asnjë bashki me kandidatë të veçantë, por shtoi se Berisha mban përgjegjësi për fitoren e zgjedhjeve. “Unë kam lavdëruar gjithmonë primaret, kam theksuar që duhet të jemi të kujdesshëm në kushtet e një regjimi mafioz e fashist si ky aktuali, ku vetë faktin se vulën e PD-së e mban në xhep Rama dhe e përdor kundër pluralizmit dhe opozitarizmit është një rast flagrant kundër qytetarëve përfshirë dhe socialistët e ndershëm. Berisha e mban përgjegjësinë se shqiptarët presin fitoren mbi këtë juntë ai mban përgjegjësinë se e ka ideuar këtë proces dhe unë e duartrokas. Është një proces i vonuar. Duhet të bëjë çdo gjë që kjo çështje të zgjidhet sa më parë se kemi të bëjmë me një regjim patronazhist të dhunshëm”. (A2 Televizion)