Milani ngec në Firence, lufta për Europën mbetet e hapur

Milani nuk mori dot më tepër se një pikë në Firence, ku u ndal në barazim 1-1 nga Fiorentina.

Një penallti pesë minuta nga fundi siguroi pikën për vjollcët, që kishin mbetur me dhjetë vetë pas daljes me karton të kuq të Dalbert.

Fillimisht Milani kaloi në epërsi në të 56’, kur gjuajtja e Rebic u devijua nga Pulgar dhe përfundoi në rrjetë. Por ky i fundit do të shlyente gabimin kur realizoi 11-metërshin që i dha barazimin skuadrës së tij, pas një faulli të fituar nga ish-lojtari i Milanit Cutrone, i rrëzuar në zonë.

Barazimi lë Milanin ende në luftë për një vend në kompeticionet europiane, ndërsa Fiorentina duhet ende të përpiqet fort për të shpëtuar nga rreziku i rënies nga kategoria. (A2 Televizion)