Pamje që të thyejnë zemrën, momenti kur familjarët identifikojnë viktimat nën rrënoja nga fotografitë e pasaportës

Pamje vërtet të rënda e që të thyejnë zemrën janë ato që vijnë nga rajoni Antakya në Hataya, kur përpjekjet e ekipeve të kërkim – shpëtimit për gjetjen e personave ende të gjallë, apo edhe viktimave nën rrënoja vijon pa ndërprerë në asnjë çast që prej orëve të para të 6 shkurtit.

Në disa prej pallateve dhe banesave private të rrënuara po hiqen mbeturinat e lëna pas nga tërmeti, ndërsa në krye të rrugës, duke ruajtur distancën e sigurisë, qëndrojnë në ankth familjarët e atyre personave që kanë jetuar në ato godina, e që ende nuk janë gjetur, të gjallë ose të vdekur.

Ajo që e bën më të dhimbshme situatën është momenti kur njëri prej pjesëtarëve të ekipeve të kërkim-shpëtimit gjen pasaportat apo mjetet e identifikimit të viktimave dhe me fotografitë e tyre në duar, afrohet te të afërmit e tyre që presin aty pranë, për t’i identifikuar.

Kjo u pa nga drejtuesit e këtyre ekipeve si një mënyrë më njerëzore identifikimi, pasi trupat e tyre ishin dëmtuar shumë nga muret e mëdha të betonit që i zunë poshtë.   (A2 Televizion)