Papa Francesku nuk ka harruar pritjen madhështore të katër viteve më parë, kur dhjetra mijëra besimtarë katolikë, por edhe myslimanë dhe orthodoksë i uruan mirëseardhjen në Tiranë.
Në fjalimin e mbajtur gjatë pritjes që kreu i kishës katolike dha në Vatikan në kuadër të ceremonisë të 550 vjetorit të vdekjes të Gjergj Kastriot Skënderbeut, Francesku përshkroi me tone entuziaste klimën e bashkëjetesës fetare të krijuar në Shqipëri, e cilësuar si “model” për vendet e tjera.
Ndjenja e shqiptarisë, për Papën, “i dha impuls bashkëjetesës paqësore midis njerëzve që i përkasin feve të ndryshme, që me kohën u shndërrua në bashkëpunim dhe vëllazëri”.
Nuk mungoi një vlerësim i qartë mbi figurën e heroit kombëtar. “Pak herë në histori një person i vetëm ka mishëruar në mënyrë kaq të gjerë virtytet e një populli”.
Por Francesku nuk iu shmang as aktualitetit shqiptarë, kur tërhoqi vëmendjen mbi rëndësinë e mbajtjes të ekuilibrave sociale në mënyrë që “gjeneratat e reja mos të detyrohen të zgjedhin emigrimin, duke i hequr vendit resurse njerëzore dhe njohuri të domosdoshme për rritjen e tij”.
Pjesë e delegacionit që u prit nga Ati i Shenjtë ishin edhe disa nga yjet e muzikës dhe kulturës shqiptare, ndër to Dua Lipa, Ermal Meta dhe Inva Mula, që më pas dhanë një koncert në teatrin "Argjentina" të Romës. (A2 Televizion)
A2 CNN Livestream
MUND TE LEXONI GJITHASHTU
