Nënkryetarja e Kuvendit, Vasilika Hysi, ishte e ftuar në Ditarin e mëngjesit ku foli në lidhje me procesin e plotësimit të vakancave në Gjykatën Kushtetuese, pasi parlamenti dhe presidenti rihapën garën e aplikimit, të detyruar nga vendimmarrja e KED e cila rrëzoi kandidatët e mëparshëm.
Sipas Vasilika Hysit ka një interes të vogël në lidhje me këto vakanca nga kandidatët për shkak se mandati nuk është i plotë dhe sepse ata shpeshherë bëhen objekt sulmi nga ana e opozitës.
“Ka pasur disa raunde të shpallura dhe rishpallura nga Kuvendi dhe Presidenti, por ka një hezitim të kandidatëve pasi periudha e mandateve nuk është e plotë, por plotësues dhe sepse ka shumë debate dhe politizime dhe etiketime të kandidatëve që kanë garuar. Ngritja e gjykatës kushtetuese është një nevojë jetike për vendin. Gjykata bëhet funksionale nëse ka 6 gjyqtarë”, tha Hysi.
Funksionalizimi sa më parë i Kushtetueses është një nga kërkesat e përsëritura të ambasadorëve dhe një nga pikat në procesin e integrimit dhe për këtë arsye, Hysi i kërkoi KED të jetë më aktive dhe të mos presë ditët e fundit të afatit për të vlerësuar kandidatët.
“Mendoj se është e mundur që kjo Gjykatës të bëhet funksionale në fund të vitit, por duhen inkurajuar kandidatët dhe KED të operojë më shpejt. Në ligj është parashikuar dhe afati. Por kjo nuk do të thotë që këto institucione të shfrytëzojnë deri ditën e fundit afatet. Nëse do të ketë një zhdërvjelltësi nga KED dhe një angazhim e funksionim me kapacitet të plotë ky proces mund të mbyllet. Mos harroni që KED është një organ me mandat 1-vjeçar dhe shumë shpejt i vjen fundi dhe mandatit dhe presidenti hedh shortin për këshillin e ri”, deklaroi nënkryetarja e Kuvendit, Hysi. (A2 Televizion)
A2 CNN Livestream
MUND TE LEXONI GJITHASHTU
