Endri Shabani, nga Nisma, i ftuar në studion e “Ditari” në A2 sqaroi zërat që qarkullojnë nëpër rrjete sociale mbi një lidhje të anëtarëve të Nismës me Fondacionin Soros.
“Unë në jetën time kam fituar rreth 15 bursa, më e madhja nga Universiteti i Oksfordit. Në këto 15 bursa, gjysmën e njërës prej tyre, rreth 13 mijë paundë, e kam fituar përmes një konkurrimi publik për të vijuar Masterin. Ku është problemi këtu? Këtu ne paguajmë me taksat tona shkollimin e fëmijëve të deputetëve. Këtë nuk e kemi problem, por qenka problem nëse fëmijët e punëtorëve aplikojnë dhe fitojnë bursa. Fondacioni Soros ka dhënë në Shqipëri 15 mijë bursa dhe i bie që të ketë 15 000 agjentë që do të rrëzojnë Republikën Popullore të Shqipërisë. Mund të shikoni nëse thurja ka përfituar një lek nga Fondacioni Soros. Unë jam krenar që kam fituar të drejtën për t’u shkolluar”, tha Shabani.
Në lidhje me hapjen e listave, ai u shpreh: “Edi Rama do të detyrohet që të hapë listat me pahir. Sado që të përpëlitet kushdo që ka frikë nga vota e shqiptarëve, nuk do ta pengojë dot. Kodi i ri Zgjedhor do të reflektojë hapjen totale të listave. Rama nuk ka 84 deputetë për të votuar draftin e tij të Kodit Zgjedhor. Nëse ndodh e kundërta, do të tregohet se kjo ishte strategji e Ramës se si të fitojë edhe kur qytetarët janë kundër tij”.
“Lista e mbyllur i heq mundësinë qytetarit që të ndëshkojë me votë. Nëse votohet për kandidatin e fundit, ai nuk ka shans që të bëhet deputet sepse mënyra e shpërndarjes së mandateve e bën teknikisht të pamundur që të shkojë nga fundi në fillim të listës. Kjo është tallje me qytetarët, krijon iluzionin e hapjes së listave”, shtoi Shabani.
Kur u pyet për bashkëpunim me ndonjë parti, Shabani u shpreh: “Kam neveri për partitë politike sepse kanë vepruar si çeta që i sulen pronës publike dhe konkurrojnë me njëra-tjetrën që kush e kush ta vjedhë më shumë. Ka ardhur një moment në vendin tonë ku establishmenti i vjetër politik është në fund të ciklit të vet. Të gjithë aktorët kanë qenë nga 8 vite në pushtet. Si mund të dalim nga ky qerthull dhe si mund të riorganizohet shoqëria jonë për t’ia filluar nga e para”.
Sa i përket debatit të taksave, Shabani theksoi: “Problemi nuk janë taksat nëse ato nuk mblidhen, nëse politika punon për të pasuruar 3-4 njerëz. Debatet janë maskaradë, kujtojnë se ne nuk e dimë se ku jetojmë. Problemi nuk është taksa 8 apo 9%, por sepse këtu vidhet me lopatë. Duhen ndryshuar gjërat thelbësisht, jo të ndryshohen njerëzit”. (A2 Televizion)
A2 CNN Livestream
MUND TE LEXONI GJITHASHTU
