Vala e protestave të forta antiraciste dhe që kulmon në shkatërrimin e simboleve që gjykohen si homazh i personazheve raciste ka përfshirë edhe Italinë.
Bëhet fjalë për një nga personalitetet më të njohura të shekullit të kaluar, gazetarin Indro Montanelli, statuja e të cilit është vandalizuar dje në Milano.
Statuja e bronztë është spërkatur me ngjyrë të kuqe, ndërkohë që janë shkruar akuza si “racist” dhe “përdhunues”. Gjesti, fillimisht anonim, është marrë përsipër nga një grup studentor i qytetit verior, si solidaritet me lëvizjen Black Lives Matter që është shpërndarë në SHBA dhe Europë pas vdekjes së afro-amerikanit George Floyd.
Indro Montanelli është një figurë qendrore e gazetarisë italiane, dhe jo vetëm. Reportazhet e tij nga Afrika dhe zonat e luftës gjatë konfliktit të dytë botëror për gazetën Corriere della Sera, janë disa nga majat e gazetarisë ndërkombëtare, që e ka vlerësuar si një prej 50 figurave më të rëndësishme të saj. Gazetari ka lënë edhe përshkrimet e detajuara të Shqipërisë në vitet ’30, ku majat i arrin në romanin “Shqipëri, një dhe një mijë”.
Thellësisht antikomunist, gazetari është akuzuar për një simpati për regjimin fashist të kohës, si dhe për disa fjali të kohës që gjykohen raciste, si dhe për martesën e tij në Etiopi me një të mitur, kur ishte ushtar.
Gazeta që e bëri të famshëm, Corriere della Sera, doli sot me një editorial ku mbron gazetarin e zhdukur në 2001 duke shkruar se “ata që akuzojnë për racizëm një person që si stil jete ka pasur antikonformizmin, lirinë e shprehjes dhe opozitën ndaj pushtetit, do të thotë mos ta njohësh aspak. Montanelli ka qenë një simbol i shekullit të kaluar, një monument i gazetarisë. Historia e vajzës etiopase dhe e ushtarit ka qenë diçka e gabuar, por e ndodhur 90 vite më parë, në kontekstin e një lufte koloniale dhe një tradite lokale”. (A2 Televizion)
A2 CNN Livestream
MUND TE LEXONI GJITHASHTU
