Tërmet në politikën holandeze, ku e djathta ekstreme ka siguruar një fitore dramatike. Pas 25 vitesh në parlament, Partia e Lirisë e populistit antiislamist, Geert projektohet të fitojë 37 vende, duke u shkëputur ndjeshëm nga rivalja më e afërt, aleanca e majtë e drejtuar nga ish-komisioneri i BE-së, Frans Timmermans që siguroi 25 vende.
Rezultati e vendos Wilders në linjë për të udhëhequr bisedimet për formimin e një koalicioni të ri qeverisës dhe ndoshta të bëhet kryeministri i parë i djathtë në një kohë trazirash politike në pjesën më të madhe të kontinentit.
“Do të sigurohemi që Holanda të jetë sërish e popullit holandez. Do të kufizojmë tsunamin e azilkërkueseve dhe emigracionin. Njerëzit do të kenë sërish para në portofolë.”
Fitorja e tij ka tronditur politikën holandeze dhe do të përcjellë valë shoku edhe rreth Europës. Por për të përmbushur premtimin e tij për të qenë kryeministër i të gjithëve, ai do të duhet të bindë partitë e tjera t'i bashkohen në koalicion.
Synimi është të sigurojë 76 nga 150 vendet e parlamentit. 60-vjeçari është zëri më i fortë kundër emigracionit dhe ka premtuar të mbyllë kufijtë, ndërsa zotimin e tjetër për të ndaluar Kuranin, e ka lënë pezull.
Para votimit, tre partitë e tjera të mëdha përjashtuan mundësinë e pjesëmarrjes në qeverinë e Wilders për shkak të politikave të tij të djathta. Por kjo mund të ndryshojë për shkak të përmasave të fitores së tij. (A2 Televizion)
A2 CNN Livestream
MUND TE LEXONI GJITHASHTU
