Elias Rodriguez, 30-vjeçari nga Çikago që vrau dy punonjësit e ambasadës izraelite në Uashington, përballet me dënimin me vdekje. Kjo është bërë e ditur nga prokurorja e përgjithshme në detyrë e kryeqytetit amerikan, Jeanine Pirro, në një konferencë për shtyp lidhur me sulmin.
Sipas saj sulmi i së mërkurës në mbrëmje po hetohet si krim urrejtjeje dhe priten akuza të tjera.
"Ky është një rast që mund të dënohet me vdekje", tha ajo të enjten, duke shtuar se është shumë herët për të thënë nëse prokurorët do të vendosin të kërkojnë një dënim me vdekje.
Steve Jenson, nga zyra e FBI-së në Uashington, i quajti vrasjet "një akt terrori dhe dhune të drejtuar kundër komunitetit hebre".
Departamenti Amerikan i Drejtësisë tha se Rodriguez është akuzuar për dy akuza për vrasje të shkallës së parë, si dhe akuza të tjera, përfshirë vrasjen e zyrtarëve të huaj.
Çifti Yaron Lischinsky dhe Sarah Lynn Milgrim u qëlluan për vdekje jashtë një eventi në Muzeun Hebraik të Kryeqytetit në Uashington DC rreth orës 21:08 sipas orës lokale të mërkurën, tha policia. I dyshuari hapi zjarr ndaj një grupi prej katër personash që po dilnin nga eventi, duke vrarë dy viktimat, tha policia.
Policia e identifikoi të dyshuarin si 30-vjeçarin Elias Rodriguez nga Çikago. Ai u arrestua në vendngjarje menjëherë pas të shtënave. Policia tha se i dyshuari bërtiti gjithashtu "Palestina e lirë" përpara se të arrestohej.
I dyshuari zbarkoi në zonën e Uashingtonit një ditë më parë, tha Jenson, dhe hetuesit ende po përcaktojnë vendndodhjen e tij para sulmit. Sipas një deklarate me betim, zyrtarët besojnë se ai fluturoi të martën nga Çikago në Uashington DC për një konferencë pune.
Llogaritë në mediat sociale të lidhura me të dyshuarin tregojnë se ai ka punuar në Shoqatën Amerikane të Informacionit Osteopatik (AOIA) në Çikago si specialist administrativ që nga viti 2024.
Në seancën gjyqësore të së enjtes, i dyshuari u akuzua dhe u urdhërua të mbetej në paraburgim. Seanca e tij e radhës ishte caktuar për 18 qershor.
(A2 Televizion)
A2 CNN Livestream
MUND TE LEXONI GJITHASHTU
