Duket se lufta midis Hamasit dhe Izraelit nuk do të mbarojë shpejt. Kjo pasi organizata militante nuk pranon që drejtimin e Gazës së pasluftës ta marrë një komitet ndërkombëtar i drejtuar nga ish kryeministri i Britanisë së Madhe, Tony Blair.
Gjatë bisedimeve në Egjipt, thuhet se Hamasi "ra dakord paraprakisht t'ia dorëzojë armët e tij një komiteti egjiptiano-palestinez, duke refuzuar kategorikisht t'ia dorëzojë menaxhimin e Rripit të Gazës një komiteti ndërkombëtar tranzicioni", raportoi agjencia e lajmeve Efe nga Kajro, duke cituar një burim të informuar palestinez.
Hamasi "propozon të negociojë menaxhimin e Gazës me Autoritetin Kombëtar Palestinez" dhe "hedh poshtë praninë e Tony Blair si guvernator i Gazës", ndërsa "pranon që ai të marrë një rol monitorimi në distancë".
“Delegacioni i lëvizjes që merr pjesë në negociatat aktuale në Egjipt kërkon të kapërcejë të gjitha pengesat për arritjen e një marrëveshjeje që përmbush aspiratat e popullit tonë dhe popullit tonë në Gaza, ndër të cilat më të rëndësishmet janë - një armëpushim i përhershëm dhe gjithëpërfshirës, tërheqja e plotë e ushtrisë pushtuese nga të gjitha zonat e Rripit të Gazës, hyrja e pakufizuar e ndihmës humanitare dhe ndihmës, sigurimi i kthimit të të zhvendosurve në zonat e tyre të banimit, fillimi i menjëhershëm i procesit gjithëpërfshirës të rindërtimit nën mbikëqyrjen e një organi kombëtar palestinez të teknokratëve dhe përfundimi i një marrëveshjeje të drejtë shkëmbimi të të burgosurve”, tha zëdhënësi i Hamasit.
Në bisedimet indirekte Izrael-Hamas të hënën në Sharm el-Sheikh të Egjiptit, palët ranë dakord për shumicën e kushteve të fazës së parë të planit të Donald Trump, duke përfshirë lirimin e pengjeve dhe vendosjen e një armëpushimi, tha një zyrtar egjiptian në kushte anonimiteti.
Plani ka marrë mbështetje të gjerë ndërkombëtare dhe Trump u tha gazetarëve të hënën se beson se ekziston një "shans shumë i mirë" për të arritur një "marrëveshje të qëndrueshme".
"Kjo shkon përtej Gazës", tha ai. "Gaza është e rëndësishme, por në të vërtetë bëhet fjalë për paqen në Lindjen e Mesme". Megjithatë, mbeten shumë pasiguri, duke përfshirë kërkesën e Hamasit për çarmatim dhe qeverinë e ardhshme të Gazës. (A2 Televizion)
A2 CNN Livestream
MUND TE LEXONI GJITHASHTU
