Ekipet e shpëtimit në Gaza të mërkurën kontrolluan rrënojat e një pallati të bombarduar që u shemb gjatë natës, duke vrarë të paktën 20 palestinezë, përfshirë fëmijë, dhe duke bllokuar dhjetëra të tjerë nën rrënoja.
Dhjetëra mijëra palestinezë jetojnë në rreth 2,000 ndërtesa të dëmtuara nga sulmet ajrore izraelite në të gjithë Gazën.
Ekipet e shpëtimit nga mbrojtja civile e Gazës thanë se të paktën 20 persona, përfshirë gjashtë fëmijë, u vranë dhe 14 të tjerë u plagosën kur ndërtesa shtatëkatëshe u shemb. Besohet se gati 100 persona të tjerë janë nën rrënoja.
Një video e siguruar nga Reuters tregonte punonjësit e shpëtimit duke u përpjekur të nxirrnin dy persona nga poshtë një muri të shembur. Një video tjetër në mediat sociale tregonte zëdhënësin e mbrojtjes civile të Gazës, Mahmoud Basal, duke mbajtur një vajzë të vogël, të mbështjellë me një shall të njollosur me gjak.
Raed Al-Dahshan, drejtori i shërbimit të mbrojtjes civile të qytetit të Gazës, tha se të paktën 10 familje jetonin në ndërtesën e shembur dhe se kishte ende shpresë për të gjetur të mbijetuar.
"Ne ende po dëgjojmë zëra nga poshtë rrënojave", tha Dahshan.
Alessandro Mrakic, kreu i zyrës së Programit të Zhvillimit të OKB-së në Gaza, tha se disa agjenci të OKB-së po merrnin pjesë në përpjekjet e shpëtimit, të cilat ai i përshkroi si të vështira për shkak të mungesës së makinerive të duhura. Agjencia e ndihmës egjiptiane po ndihmonte gjithashtu. (A2 Televizion)
A2 CNN Livestream
MUND TE LEXONI GJITHASHTU
