I dërguari special i SHBA-së, Steve Witkoff, dhe dhëndri i Presidentit të SHBA-së, Donald Trump, Jared Kushner, do të marrin pjesë në bisedimet për planin e paqes në Gaza midis negociatorëve izraelitë dhe Hamasit në Egjipt këtë të mërkurë.
Kjo vjen ndërsa dita e dytë e bisedimeve indirekte të martën përfundoi pa rezultate të prekshme, tha për BBC-në një zyrtar i lartë palestinez i njohur me negociatat, shkruan A2 CNN.
Trump mbajti një ton pozitiv të martën, ndërsa Izraeli shënoi përvjetorin e dytë të sulmeve të Hamasit më 7 tetor, duke thënë se "ekziston mundësia që të kemi paqe në Lindjen e Mesme".
Kryeministri izraelit Benjamin Netanyahu nuk komentoi mbi statusin e bisedimeve, por u tha izraelitëve se ishin në "ditë vendimtare".
Në një postim në X, Netanyahu shtoi se Izraeli do të vazhdojë të veprojë për të arritur qëllimet e tij të luftës: "Kthimi i të gjithë të rrëmbyerve, eliminimi i regjimit të Hamasit dhe premtimi se Gaza nuk do të përbëjë më kërcënim për Izraelin", shkruan A2 CNN.
Kryeministri i Katarit, Sheikh Mohammed bin Abdul Rahman Al Thani, i cili shihet si një ndërmjetës kryesor, do t'i bashkohet gjithashtu bisedimeve, tha një zyrtar për agjencinë e lajmeve Reuters.
Pjesëmarrja e Al Thanit kishte për qëllim "të shtynte përpara planin e armëpushimit në Gaza dhe marrëveshjen për lirimin e pengjeve", tha zyrtari.
Ministri i Jashtëm i Katarit dhe kreu i inteligjencës turke pritet t'i bashkohen atij. (A2 Televizion)
A2 CNN Livestream
MUND TE LEXONI GJITHASHTU
