Donald Trump nis luftën me Kanadanë, por atë tregtare. Presidenti amerikan njoftoi vendosjen e një tarife prej 35 për qindësh për shkëmbimet tregtare me shtetin fqinj dhe aleat, duke nisur nga 1 gushti.
Vendimi vjen në një kohë kur të dyja vendet ishin vetëm disa ditë larg një afati të vetëimponuar për të arritur një marrëveshje të re tregtare. Njoftimi erdhi në formën e një letre të botuar në platformën e mediave sociale të Trump, Truth Social, së bashku me kërcënime shtesë për tarifa të përgjithshme prej 15% ose 20% për shumicën e partnerëve tregtarë.
Kryeministri kanadez Mark Carney tha se qeveria e tij do të vazhdojë të mbrojë punëtorët dhe bizneset e vendit të tij ndërsa ata po shkojnë drejt afatit të ri.
Trump u ka dërguar më shumë se 20 letra të tilla partnerëve të tjerë të SHBA-së këtë javë. Ai thotë gjithashtu se së shpejti do të njoftojë tarifa të reja ndaj Bashkimit Europian.
Ashtu si në letrën e Kanadasë, Trump është zotuar t’i zbatojë këto tarifa duke nisur nga 1 gushti. Një tarifë e përgjithshme prej 25% është vendosur tashmë për disa mallra kanadeze, me këtë shtet që është goditur rëndë edhe nga tarifat globale të Trump për çelikun, aluminin dhe automjetet.
Kanadaja shet rreth tre të katërtat e mallrave të saj në SHBA dhe është një qendër e prodhimit të automjeteve dhe një furnizues i madh i metaleve, duke i bërë tarifat e SHBA-së veçanërisht të dëmshme për këta sektorë.
Trump gjithashtu i lidhi tarifat me atë që e quajti “dështimi i Kanadasë” për të ndaluar rrjedhën e fentanilit në SHBA. Kryeministri Carney iu përgjigj përmes rrjeteve sociale duke pretenduar se ka bërë progres të madh në këtë drejtim. (A2 Televizion)
A2 CNN Livestream
MUND TE LEXONI GJITHASHTU
