Donald Trump ka paralajmëruar një lëvizje të fortë ndaj Iranit, duke deklaruar se SHBA mund të bllokojë Ngushticën e Hormuzit pas dështimit të bisedimeve në Islamabad mes Uashingtonit dhe Teheranit.
Në një postim në rrjetet sociale të dielën, Trump tha se Marina amerikane “do të fillojë procesin e bllokimit të çdo anijeje që përpiqet të hyjë ose të dalë nga Ngushtica e Hormuzit”, një prej korridoreve më të rëndësishme detare për tregtinë globale të naftës.
Analistët e konsiderojnë këtë deklaratë si një përshkallëzim të madh të tensioneve. Sipas Chris Featherstone nga Universiteti i Jorkut, kërcënimi i bllokadës po përdoret si mjet presioni në negociata.
“Trump po e përdor kërcënimin e bllokadës për të rritur presionin ndaj Iranit, duke e vendosur atë në një pozitë më të vështirë për të pranuar kushtet e SHBA-së”, tha ai për Al Jazeera.
Ngushtica e Hormuzit është një pikë strategjike kyçe, përmes së cilës kalon një pjesë e madhe e furnizimit botëror me naftë. Çdo bllokim i saj do të kishte pasoja të mëdha në tregjet globale dhe në stabilitetin rajonal. (A2 Televizion)
A2 CNN Livestream
MUND TE LEXONI GJITHASHTU
