Ushtria ruse ka marrë nën kontroll qytetin Yasnaya Polyana, teksa luftimet në rajonin e Donjetskut kanë hyrë në një fazë intensive. Pushtimin e qytetit në fjalë e ka bërë të ditur Ministria ruse e Mbrojtjes, ndërsa raportohet se pesë civilë janë vrarë nga sulmet e Moskës në disa qytete të Donjetskut.
"Si rezultat i veprimeve aktive dhe vendimtare, njësitë e grupimit lindor çliruan vendbanimin Yasnaya Polyana të Republikës Popullore të Donetsk", tha ministria ruse, ndërsa kreu i administratës ushtarake të rajonit, Vadym Filashkin konfirmoi viktimat.
Dy humbën jetën në Zarichny, një në Druzhkivka, një në Beretski dhe një në Uspenivka. Tre persona të tjerë u plagosën, sipas Vadym Filachkine, i cili konfirmoi gjithashtu se në total janë 2,850 njerëz të vrarë në rajon që nga fillimi i pushtimit rus.
Teksa rusët përparojnë në Donjetsk, Presidenti Volodymyr Zelensky i është adresuar me një mesazh ukrainasve që jetojnë jashtë vendit për t’iu bashkuar ushtrisë, shkruan A2.
Zelensky bëri thirrje që bashkatdhetarët e tij të kthehen, edhe pse shumë prej ukrainasve që “ia mbathën” për në Europë pretendojnë se kanë "arsye serioze" pse nuk mund të ndihmojnë atdheun e tyre.
"Unë mund t'u kërkoj me zë të lartë ukrainasve tanë që janë jashtë vendit të vijnë dhe të ndihmojnë, të punojnë në industrinë e mbrojtjes, të ndihmojnë ushtarët tanë, të paguajnë taksat. Ne kemi nevojë për mbështetjen e tyre", tha Zelensky.
Më tej lideri i Kievit shtoi se Rusia planifikon të përdorë ushtarët e Koresë së Veriut në fushën e betejës në Ukrainë në të ardhmen e afërt. “Është çështje ditësh, jo muajsh”, tha presidenti ukrainas, raporton A2.
Ndërkohë, Kremlini ka shuar ambiciet e Zelensky-t për t'u bashkuar me NATO-n dhe Bashkimin Evropian, teksa ministri i Jashtëm rus, Sergei Lavrov ka thënë se kjo nuk do të kontribuojë për paqen dhe stabilitetin në Evropë.
"Regjimi rusofobik në Kiev vazhdon të promovojë formulën e paqes të Zelensky, e cila kërkon dorëzimin e Rusisë. Dhe disa javë më parë, ai zbuloi një plan po aq skizofrenik për fitoren. Sigurisht, as formula, as plani, as fantazitë për anëtarësimin e Ukrainës së kontrolluar nga Kievi në NATO ose BE po sjellin paqen në Evropë më afër”, përfundoi Lavrov, duke folur në Konferencën e dytë Ndërkombëtare të Minskut për Sigurinë Euroaziatike. (A2 Televizion)
A2 CNN Livestream
MUND TE LEXONI GJITHASHTU
