Republika Demokratike e Kongos do të marrë 70 mijë doza të vaksinës Ervebo, ndërsa autoritetet shëndetësore po përpiqen të frenojnë shpërthimin e virusit Ebola, i cili ka shkaktuar mijëra viktima.
Organizata Botërore e Shëndetësisë ka njoftuar se dozat do të dërgohen nga rezervat globale të vaksinave kundër Ebolës. Një pjesë e tyre do të përdoret edhe në kuadër të një prove klinike për të vlerësuar nëse vaksina Ervebo mund të ofrojë mbrojtje ndaj virusit Bundibugyo, i cili është përgjegjës për shpërthimin aktual, shkruan A2CNN.
Sipas të dhënave të publikuara deri tani, shpërthimi ka shkaktuar 2,476 viktima nga 5,208 raste të konfirmuara.
Vaksina Ervebo është e licencuar për përdorim kundër virusit Ebola, por nuk është e miratuar për virusin Bundibugyo. Për këtë arsye, OBSH thekson se ende nuk dihet nëse ajo ofron mbrojtje ndaj këtij virusi dhe se provat klinike janë të nevojshme për të siguruar të dhëna shkencore.
Nga 70 mijë dozat e parashikuara, 20 mijë do të përdoren në provën klinike, ndërsa 50 mijë të tjerat do t’u administrohen punonjësve të vijës së parë dhe personelit shëndetësor, në përputhje me rekomandimet e ekspertëve të imunizimit.
Aleanca globale e vaksinave, Gavi, ka njoftuar gjithashtu se do të sigurojë 7 milionë dollarë për financimin e dërgesës së vaksinave në Kongon Demokratike, si dhe 6 milionë dollarë të tjera për fushatat e vaksinimit në zonat me rrezik të lartë.
OBSH e ka cilësuar situatën si një emergjencë globale, ndërsa agjencitë e Kombeve të Bashkuara po mbështesin autoritetet kongoleze në përpjekjet për të kufizuar përhapjen e virusit.
(A2 Televizion)
A2 CNN Livestream
MUND TE LEXONI GJITHASHTU
