Të paktën 15 persona janë vrarë dhe rreth 40 të tjerë janë plagosur si pasojë e një vale sulmesh masive ruse me raketa dhe dronë ndaj Kievit dhe rajonit përreth, gjatë natës së 19 dhe 20 gushtit.
Sulmet nisën rreth mesnatës, duke shkaktuar shpërthime të fuqishme në disa zona të kryeqytetit ukrainas. Autoritetet raportuan dëme të mëdha në ndërtesa banimi, objekte industriale dhe infrastruktura të tjera. Mijëra banorë mbetën gjithashtu pa energji elektrike.
Kryebashkiaku i Kievit, Vitaly Klitschko, tha se një spital fëmijësh dhe një shkollë u dëmtuan nga sulmet. Në distriktin Solomianskyi u goditën gjithashtu objekte industriale, ndërsa ekipet e shpëtimit vijuan kërkimet në rrënoja për persona të bllokuar, shkruan A2CNN.
Sipas autoriteteve ukrainase, një pjesë e sulmeve goditi edhe rajonin e Kievit. Në distriktin Brovary, një person humbi jetën dhe një tjetër u plagos.
Nga ana e saj, Ministria ruse e Mbrojtjes pretendoi se objektivat ishin një strukturë për prodhimin e pjesëve të dronëve dhe një depo municionesh. Këto pretendime nuk janë verifikuar në mënyrë të pavarur.
Pas sulmit, Presidenti ukrainas Volodymyr Zelensky përsëriti thirrjen ndaj aleatëve perëndimorë për të përshpejtuar furnizimin me sisteme të mbrojtjes ajrore, veçanërisht me raketa për sistemet amerikane Patriot.
“Çdo raketë shtesë shpëton jetën e popullit tonë”, deklaroi Zelensky, duke theksuar se Ukraina ka nevojë për kapacitete më të mëdha antibalistike për t’u mbrojtur nga sulmet ruse.
Edhe Vitaly Klitschko kërkoi mbështetje të mëtejshme nga partnerët ndërkombëtarë, duke theksuar nevojën për municione dhe sisteme kundërraketore.
Sulmi i fundit ka lënë pas viktima, dhjetëra të plagosur dhe dëme të konsiderueshme materiale, ndërsa ekipet ukrainase të emergjencave vijojnë operacionet e kërkim-shpëtimit në zonat e goditura.
(A2 Televizion)
A2 CNN Livestream
MUND TE LEXONI GJITHASHTU
