Trupat izraelite u përplasën të mërkurën me kolonët hebrenj ndërsa përpiqeshin t'i shpërndanin ata nga një postë e ngritur në Bregun Perëndimor, pikërisht përballë shtëpive palestineze; më vonë, trupat u tërhoqën nga zona pasi nuk arritën t'i largonin kolonët.
Incidenti në periferi të fshatit palestinez Qusra, në Bregun Perëndimor të pushtuar, shënoi një përballje të rrallë midis kolonëve dhe ushtrisë, dhe ndodh në një kohë kur ka një rritje të ndjeshme të rasteve të konfiskimit të tokave dhe sulmeve ndaj palestinezëve nga ana e kolonëve.
Ushtria është vënë nën presion në rritje për të ndaluar konfiskimet e paligjshme të tokave nga kolonët, të cilët ndihen të inkurajuar nga qeveria e krahut të djathtë të kryeministrit Benjamin Netanyahu, e cila ka nxitur zgjerimin e shpejtë të vendbanimeve në këtë territor.
Artileria izraelite qëlloi predha me fosfor të bardhë në lartësitë Ali Taher në distriktin Nabatieh të Libanit jugor. Agjencia shtetërore libaneze e lajmeve NNA raportoi sulmin, i cili pasoi bombardime të tjera gjatë natës të së martës. Në orët e fundit, artileria izraelite kishte goditur gjithashtu Wadi Hujeir, Doha, Kfar Remman dhe zonën midis Talussa dhe Bani Hayyan në distriktin Marjayun. Mbrëmjen e djeshme, forcat ajrore izraelite kishin goditur tashmë zonën Ayn al-Tfura, në periferi të Qantara drejt Ëadi Hujeir. Shkatërrime të mëtejshme u kryen në Haddatha, në distriktin Bint Jbeil, me shpërthime që u dëgjuan deri në Tyre dhe Nabatieh, ndërsa automjetet ushtarake izraelite po lëviznin drejt Beit Yahun.
Po ashtu raportohet se forcat izraelite goditën një ndërtesë shkolle në fshatin Zawtar al-Sharqiyah, në jug të Libanit, sipas agjencisë kombëtare libaneze të lajmeve NNA. Këshilli i fshatit i bëri thirrje presidentit libanez Joseph Aoun dhe kryeministrit Nawaf Salam që të ndërhyjnë për të ndaluar shkatërrimin e ndërtesave në zonë. Duke folur për televizionin Al Araby me seli në Katar, një burim nga Forcat e Armatosura libaneze tha se ushtria izraelite shkatërroi bashkinë, një klinikë, një çerdhe dhe disa shtëpi.
Disa persona u plagosën në Tyre, në jug të Libanit, pasi një dron izraelit goditi një tubim fetar, njoftoi Agjencia Kombëtare e Lajmeve e Libanit.
(A2 Televizion)
A2 CNN Livestream
MUND TE LEXONI GJITHASHTU
