Irani thotë se shtatë cisterna nafte janë goditur dhe dëmtuar në Ngushticën e Hormuzit, shifra më e lartë e regjistruar brenda një dite në këtë rrugë ujore që nga nisja e luftës mes Shteteve të Bashkuara, Izraelit dhe Iranit, më 28 shkurt.
Garda Revolucionare Islamike e Iranit deklaroi të enjten se katër prej anijeve po transportonin naftë kur u shënjestruan dhe morën flakë gjatë natës. Tri cisternat e tjera u nxorën jashtë funksionit pasi goditën mina.
Raporti nuk dha detaje për viktima të mundshme apo për flamujt e shteteve nën të cilët lundronin cisternat.
IRGC paralajmëroi gjithashtu se mund të godasë bazat amerikane në Lindjen e Mesme, nëse Uashingtoni ndërhyn për të ndihmuar cisternat të kalojnë në pjesë të tjera të ngushticës.
“Ushtria amerikane duhet ta dijë se, nëse kjo prirje vazhdon, konflikti do të shtrihet edhe në bazat e saj në rajon”, deklaroi IRGC në një njoftim të publikuar në faqen e saj, Sepah News. “Ky është një paralajmërim serioz.”
Irani pretendon se kontrollon Ngushticën e Hormuzit, një rrugë strategjike detare përmes së cilës, para shpërthimit të luftës, kalonte një e pesta e furnizimit botëror me naftë. Teherani sulmon rregullisht anijet që përpiqen të lundrojnë në këtë ngushticë pa autorizimin e tij.
Ndërkohë, ushtria amerikane po shoqëron një numër gjithnjë e më të madh anijesh përmes kësaj rruge ujore, ndërsa Irani u është përgjigjur këtyre veprimeve duke shtuar sulmet.
Presidenti amerikan, Donald Trump, deklaroi të enjten se “Irani po bën gjithçka që mundet për të rritur çmimin e naftës përpara zgjedhjeve të mesmandatit në SHBA”.
(A2 Televizion)
A2 CNN Livestream
MUND TE LEXONI GJITHASHTU
