Në sulmin më vdekjeprurës në zemër të Bejrutit që prej nisjes së luftës kundër Hezbollah, Izraeli shkaktoi të paktën 22 viktima dhe plagosi mbi 117 të tjerë në zonat rezidenciale të kryeqytetit libanez, shkruan A2 CNN.
Lagjia me popullsi të dendur dhe dyqane e Bachouras u kthye në skenë shkatërrimi masiv dhe ekipet e shpëtimit po gërmojnë për nxjerrjen e personave të bllokuar në gërmadha. Mediat ndërkombëtare që citojnë burime të sigurisë thonë se Ëafiq Safa, një aleat i ngushtë i liderit të vrarë të Hezbollahut, Hassan Nasrallah, ishte shënjestra e sulmit të fundit, por, siç raportohet, besohet të ketë mbijetuar.
IDF nuk paralajmëroi e as nuk lëshoi urdhra evakuimi për sulmin në zonën e populluar të cilën nuk e kishte goditur më parë.
“Isha duke u lutur. Dëgjova sulmin e parë dhe mendova se ishte në shtëpinë time. I dyti ishte edhe më i fuqishëm dhe njerëzit dolën zbathur nga banesat. Të gjithë po bërtisnim. Kur u kthyem, pamë këtë skenë të tmerrshme. Është e pabesueshme”, thotë një banor.
Në Libanin jugor dy paqeruajtës të Kombeve të Bashkuara u plagosën kur një tank izraelit sulmoi një kullë vëzhgimi pranë selisë qendrore të misionit, duke shtyrë OKB të denoncojë rreziqet me të cilat përballet stafi i saj.
Megjithatë, pas një mbledhje të Këshillit të Sigurimit mbrëmjen e së enjtes u vendos që mbi 10 mijë trupa paqeruajtëse do të mbeten në jug të Libanit.
Qeveria italiane reagoi ashpër, duke thirrur edhe ambasadorin izraelit në notë proteste. Ministri i Mbrojtjes, Guido Crosetto, e cilëson sulmin ndaj misionit paqeruajtës një krim lufte.
(A2 Televizion)
A2 CNN Livestream
MUND TE LEXONI GJITHASHTU
