Influenceri kontrovers Andrew Tate ka ekzagjeruar pasurinë dhe stilin e tij të jetesës në rrjetet sociale, ndërsa disa prej makinave luksoze dhe një jaht 50 milionë dollarësh të shfaqur në postimet e tij nuk kanë qenë në pronësi të tij. Kështu pretendojnë përfaqësuesit e tij ligjorë në një parashtresë drejtuar gjykatës në Florida, përcjell A2 CNN.
Andrew Tate dhe vëllai i tij, Tristan, ndodhen në paraburgim në Florida dhe po kërkojnë lirimin me kusht, ndërsa presin përfundimin e procedurave të ekstradimit drejt Britanisë së Madhe. Dy vëllezërit u arrestuan muajin e kaluar, pasi prokurorët britanikë ngritën 38 akuza të reja, përfshirë akuza për përdhunim dhe vepra të lidhura me trafikimin seksual. Të dy i mohojnë akuzat.
Prokurorët kanë argumentuar se vëllezërit përbëjnë rrezik për arratisje, duke iu referuar deklaratave të tyre publike për pasurinë, ndikimin dhe mundësinë për të përdorur identitete të ndryshme.
Por avokatët e tyre thonë se pasuria e paraqitur në rrjetet sociale është pjesë e një strategjie për të tërhequr vëmendje dhe për të gjeneruar të ardhura.
Sipas tyre, jahti luksoz i përmendur nga prokurorët nuk është në pronësi të vëllezërve Tate, ndërsa ata janë paguar për ta promovuar atë. Edhe automjete luksoze, përfshirë një Aston Martin dhe makina Bugatti të shfaqura në përmbajtjet e tyre online, thuhet se ishin marrë me qira.
“Ekzagjerimi” është përdorur gjithashtu për efekt komik dhe për të krijuar një imazh publik, argumentojnë avokatët.
Andrew Tate u bë i njohur fillimisht pas pjesëmarrjes në versionin britanik të “Big Brother” në vitin 2016. Ish-kickbokseri ka miliona ndjekës në rrjetet sociale dhe është bërë i njohur për videot ku shfaq një stil jetese të konsideruar ultra-luksoz.
Aktualisht, dy vëllezërit përballen me gjithsej 59 akuza për vepra të dyshuara të kryera midis korrikut 2010 dhe gushtit 2017. (A2 Televizion)
A2 CNN Livestream
MUND TE LEXONI GJITHASHTU
