Një avion transporti ushtarak amerikan u ul të martën në aeroportin Vnukovo të Moskës, sipas të dhënave nga shërbimi i gjurmimit të fluturimeve Flightradar24. Një video e publikuar në rrjetet sociale tregonte avionin teksa i afrohej aeroportit, përcjell A2 CNN.
Agjencia e Lajmeve Reuters verifikoi vendndodhjen përmes ndërtesave, parkimit të automjeteve dhe pemëve të dukshme në video, të cilat përputheshin me imazhet satelitore dhe ato arkivore të zonës. Data e regjistrimit të videos u verifikua përmes të dhënave të monitorimit të fluturimit.
Avioni u identifikua si një Boeing C-17A Globemaster III, bazuar në motorët, krahët dhe bishtin e tij. Avioni po fluturonte në drejtim të aeroportit Vnukovo të Moskës.
Boeing Globemaster, me numër regjistrimi amerikan 07-7181, kishte fluturuar direkt nga Riga, Letoni, dhe u ul në Moskë rreth orës 9:00 të mëngjesit.
Reuters nuk ishte në gjendje të verifikonte nëse avioni transportonte ngarkesë apo pasagjerë. Ndërsa Kremlini deklaroi se nuk kishte informacion për avionin.
Sipas të dhënave të Flightradar24, avioni kishte mbërritur në Riga më 23 gusht, duke u nisur nga baza ajrore amerikane në Camp Springs, pranë Uashingtonit.
Fluturimi i fundit direkt i një avioni të regjistruar në SHBA drejt Rusisë nga Europa ishte kryer në janar të këtij viti. Në atë rast, avioni transportonte të dërguarit specialë amerikanë Steven Witkoff dhe Jared Kushner, të cilët udhëtuan në Moskë për bisedimet mbi paqen në Ukrainë me presidentin rus Vladimir Putin.
Javën e kaluar, Kremlini deklaroi se nuk kishte ende informacion lidhur me një tjetër vizitë të mundshme të Kushner dhe Witkoff në Moskë, ndërsa negociatat mes SHBA-së dhe Rusisë për Ukrainën janë kryesisht të bllokuara, në një kohë kur lufta në Iran ka ndikuar në zhvillimet diplomatike. (A2 Televizion)
A2 CNN Livestream
MUND TE LEXONI GJITHASHTU
