Irani ka krijuar një agjenci qeveritare për të kontrolluar dhe taksuar anijet që kërkojnë të kalojnë përmes Ngushticës strategjike të Hormuzit, raportoi të enjten një kompani e të dhënave detare, Lloyd’s, ndërsa Teherani tha se po shqyrtonte propozimet më të fundit të SHBA-së për t’i dhënë fund luftës.
Përpjekja e Iranit për të formalizuar kontrollin mbi këtë korridor detar ka ngritur shqetësime të reja për transportin ndërkombëtar, pasi qindra anije tregtare kanë mbetur të bllokuara në Gjirin Persik dhe nuk po arrijnë të dalin në det të hapur. Megjithatë, shpresa se konflikti dymujor mund të përfundojë së shpejti ka ndikuar pozitivisht në tregjet ndërkombëtare.
Agjencia, e quajtur Autoriteti i Ngushticës së Gjirit Persik, “po pozicionohet si i vetmi autoritet i vlefshëm për të dhënë leje për anijet që kalojnë nëpër ngushticë”, raportoi Lloyd’s në një përmbledhje online.
Ndërkohë zyrtarë të lartë iranianë kanë thënë se Udhëheqësi Suprem, Mojtaba Khamenei, po luan një rol kyç në mbikëqyrjen e negociatave me SHBA-në.
Megjithatë, ai vazhdon të qëndrojë i fshehur dhe nuk është shfaqur në publik që kur u plagos në fillim të luftës. Presidenti iranian Masoud Pezeshkian tha se së fundmi kishte zhvilluar një takim me Khamenein që zgjati më shumë se dy orë. (A2 Televizion)
A2 CNN Livestream
MUND TE LEXONI GJITHASHTU
