Pas një dekade kaotike në politikën britanike, që daton prej referendumit të Brexit në 2016, edhe një herë Britania e Madhe bëhet gati për një kryeministër të ri.
Çdo kandidat që dëshiron të zëvendësojë Starmer do të duhet të sigurojë mbështetjen e 20% të anëtarëve laburistë në Parlament. Me laburistët që kanë aktualisht 403 vende, do të thotë se 81 ligjvënës do të duhet të mbështesin kandidatin e ri.
Por teksa Starmer njoftoi se gara për ta pasuar do të nisë nga 9 korriku, laburistët duket se e kanë një favorit, dhe ai është Andy Burnham, një njeri i brendshëm i sistemit i kthyer në figurë të pavarur.
56-vjeçari ka ndërtuar imazhin e tij si një “njeri i zakonshëm” nga veriu i Anglisë, i afërt me njerëzit, që preferon bluzat në vend të kostumit dhe në kohën e lirë luan futboll ose merr pjesë në “beteja DJ-sh” me muzikë të viteve ’90.
I lindur dhe rritur midis Liverpulit dhe Manchesterit, ai u bashkua me Partinë Laburiste që në adoleshencë, studioi në Cambridge dhe hyri në Parlament në vitin 2001. Më pas shërbeu për vite në nivele të larta të qeverisë, përfshirë edhe në kabinetin e Gordon Brown, dhe bëri dy tentativa të pasuksesshme për të drejtuar Partinë Laburiste.
Pas largimit nga Westminster-i, u zgjodh kryebashkiak i Manchesterit të Madh, ku fitoi reputacion për transformimin urban të qytetit, përmirësimin e transportit publik dhe për mbrojtjen e kauzave lokale.
Gjatë pandemisë COVID-19 u bë figurë e njohur kombëtare për përplasjet me qeverinë qendrore, duke fituar nofkën “King of the North”, Mbreti i Veriut.
U pa si një rival i mundshëm i kryeministrit Keir Starmer, pas një fitoreje elektorale që ai e quajti “pikë kthese” për politikën britanike.
Ai mbron një qasje më të majtë brenda Laburistëve dhe promovon atë që e quan “Manchesterism”, një politikë që vendos njerëzit dhe rajonet në qendër, jo Londrën.
Megjithatë, kritikët thonë se vizioni i tij ekonomik mbetet i paqartë dhe se qeverisja e një qyteti është shumë ndryshe nga drejtimi i një vendi të tërë.
Përkrahësit e shohin si një figurë karizmatike me aftësi komunikimi dhe potencial për të ndryshuar politikën britanike në nivel kombëtar. (A2 Televizion)
A2 CNN Livestream
MUND TE LEXONI GJITHASHTU
