Rusia dhe Koreja e Veriut synojnë të thellojnë bashkëpunimin dhe të kontribuojnë në krijimin e një “rendi të ri dhe të drejtë botëror”. Deklarata është bërë nga ministri i Jashtëm rus, Sergei Lavrov, gjatë një takimi me homologen e tij koreano-veriore, Choe Son Hui.
Sipas agjencisë shtetërore koreano-veriore KCNA, Lavrov rikonfirmoi angazhimin e Moskës për zgjerimin e bashkëpunimit me Phenianin në të gjitha fushat, duke e lidhur këtë partneritet edhe me çështjet e sigurisë rajonale dhe ndërkombëtare.
Marrëdhëniet mes dy vendeve janë forcuar ndjeshëm pas nisjes së luftës së Rusisë në Ukrainë. Bashkëpunimi mes Moskës dhe Phenianit ka përfshirë edhe dimensionin ushtarak, ndërsa të dyja palët kanë theksuar partneritetin e tyre strategjik.
Pjesëmarrja e trupave koreano-veriore në luftimet në rajonin rus të Kurskut është cilësuar nga Lavrov si dëshmi e “miqësisë luftarake” mes Rusisë dhe Koresë së Veriut.
Ndërkohë, Koreja e Jugut dhe vendet perëndimore kanë akuzuar Phenianin për furnizimin e Rusisë me municione dhe raketa për përdorim në luftën kundër Ukrainës. Në këmbim, sipas këtyre vlerësimeve, Koreja e Veriut dyshohet se po merr mbështetje teknologjike dhe ushtarake nga Moska për zhvillimin e kapaciteteve të saj të armatimit. (A2 Televizion)
A2 CNN Livestream
MUND TE LEXONI GJITHASHTU
