Presidenti francez Emmanuel Macron i bëri thirrje liderit kinez Xi Jinping të forcojë bashkëpunimin në çështjet gjeopolitike, tregtare dhe mjedisore, ndërsa Bashkimi Evropian kërkon mbështetjen e Kinës për t’i dhënë fund luftës në Ukrainë.
Macron udhëtoi me një delegacion të madh biznesi në vizitën e tij të katërt shtetërore në ekonominë e dytë më të madhe të botës, duke kërkuar të forcojë profilin e tij në politikën e jashtme dhe të sigurojë marrëveshje të reja tregtare për industrinë franceze. Të dy liderët nënshkruan 12 marrëveshje bashkëpunimi, që mbulojnë investimet, energjinë bërthamore dhe ruajtjen e pandave. Macron i kërkon Jinping t’i bashkohet përpjekjeve për paqe në Ukrainë.
“Shpresoj që Kina t'i bashkohet thirrjes dhe përpjekjeve tona për të arritur, sa më shpejt të jetë e mundur, të paktën një armëpushim në formën e një moratoriumi për sulmet që synojnë infrastrukturën kritike. Evropa dhe Kina kanë një rol për të luajtur, së bashku me partnerë të tjerë, në hedhjen e themeleve për një qeverisje ekonomike globale të drejtë dhe të fortë, të bazuar në rregulla dhe jo në ligjin e më të fortit”, tha Macron.
Kina, nga ana e saj, dëshiron të zbusë tensionet tregtare me BE-në lidhur me industrinë e sajtë subvencionuar të automjeteve elektrike, dhe të paraqitet si një partner i besueshëm në tregti dhe një alternativë ndaj SHBA-së, sidomos në kohën kur ekonomitë globale përballen me rreziqe recesioni për shkak të tarifave të vendosura nga administrata e Donald Trump.
“Dy palët janë dakordësuar të konsolidojnë bashkëpunimin e tyre tradicional në hapësirën ajrore dhe energjinë bërthamore dhe për të zgjeruar bashkëpunimin në industritë në zhvillim, si ajo e gjelbër, ekonomia digjitale dhe inteligjenca artificiale”, tha Xi Jinping.
Të premten, Xi do ta shoqërojë Macron në provincën Sichuan, një gjest i rrallë, pasi lideri kinez zakonisht nuk udhëton me vizitorët jashtë Pekinit. Megjithatë, analistët vlerësojnë se pengesat politike mbeten të shumta. Xi nuk pritet të miratojë porosinë e shumëpërfolur të 500 avionëve Airbus, për të mos dobësuar pozitat e Pekinit në negociatat tregtare me SHBA-në, e cila kërkon angazhim për blerje të reja të Boeing.
Po ashtu, nuk pritet të hiqen kufizimet ndaj çmimeve minimale për eksportet franceze të konjakut, e çdo kompromis i mundshëm i Xi për Ukrainën mbetet i kufizuar, duke pasur parasysh angazhimet e fundit të Kinës për mbështetje ndaj Rusisë. (A2 Televizion)
A2 CNN Livestream
MUND TE LEXONI GJITHASHTU
