Norvegjia po ndërton një nga projektet më ambicioze infrastrukturore në botë, tunelin Rogfast, i cili do të jetë tuneli rrugor nënujor më i gjatë dhe më i thellë në botë. Me një gjatësi prej 27 kilometrash dhe një thellësi maksimale prej 392 metrash nën nivelin e detit, projekti synon të transformojë transportin përgjatë bregdetit perëndimor të vendit.
Tuneli do të shërbejë si pjesë e autostradës E39, duke lidhur rajonet Stavanger dhe Haugesund dhe duke krijuar një korridor rrugor më të shpejtë drejt Bergenit, qytetit të dytë më të madh të Norvegjisë.
Ndërtimi nisi në janar 2018, por u ndërpre në fund të vitit 2019 për shkak të kostove të parashikuara më të larta se sa ishte planifikuar, shkruan A2 CNN. Kontratat ekzistuese u anuluan dhe projekti iu nënshtrua një ristrukturimi. Punimet rifilluan në fund të vitit 2021, ndërsa përfundimi parashikohet në vitin 2033.
Investimi vlerësohet në rreth 25 miliardë korona norvegjeze, ose afërsisht 2.2 miliardë euro.
Udhëtim më i shpejtë dhe pa tragete
Rogfast do të zëvendësojë lidhjet aktuale me tragete, duke shkurtuar me rreth 40 minuta udhëtimin mes Bergenit dhe Stavangerit.
Sipas Anne Brit Moen, menaxhere e projektit në kompaninë ndërkombëtare të ndërtimit Skanska, tuneli do të përmirësojë ndjeshëm lidhjen mes rajoneve dhe do të krijojë një rrugë më të shpejtë e të besueshme për banorët.
Struktura do të përbëhet nga dy tunele të veçanta, secili me dy korsi për automjetet. Një nga elementet më të veçanta të projektit është ndërtimi i një rrethrrotullimi të dyfishtë, rreth 260 metra nën nivelin e detit.
Ky rrethrrotullim do të lidhë tunelin kryesor me një degë që të çon drejt ishullit Kvitsøy, një nga komunat më të vogla të Norvegjisë.
Sfidat nën det, teknologji për saktësi milimetrike
Ndërtimi i një tuneli kaq të gjatë nën det paraqet sfida të mëdha teknologjike dhe gjeologjike. Punimet po zhvillohen njëkohësisht nga të dy skajet, me synimin që ekipet të takohen në mes me një devijim maksimal prej vetëm 5 centimetrash.
Për këtë përdoren skanerë laserë dhe pajisje të avancuara matëse, të cilat regjistrojnë rreth 2 milionë pika të dhënash në sekondë. Informacioni krijon një model digjital të tunelit, që krahasohet me projektin për të identifikuar pasaktësitë.
Sipas Burkhard Boeckem, drejtues teknologjik në kompaninë Hexagon, matjet e sakta ndihmojnë në shmangien e gabimeve, reduktimin e kostove dhe kufizimin e materialeve të panevojshme.
Një nga problemet kryesore mbetet izolimi i shkëmbinjve nga uji i kripur. Punimet kanë arritur tashmë në rreth 300 metra nën nivelin e detit, ku janë regjistruar rrjedhje të konsiderueshme të ujit.
Për të garantuar sigurinë, tuneli do të pajiset me sistem ventilimi gjatësor, ventilim përmes puseve vertikale, kamera dhe radarë për monitorimin e trafikut, si dhe sisteme alarmi në kohë reale për aksidentet dhe bllokimet.
Pjesë e një projekti më të madh
Rogfast është pjesë e modernizimit të autostradës E39, e cila shtrihet 1100 kilometra nga Trondheim në Kristiansand.
Aktualisht, udhëtimi përgjatë gjithë rrugës zgjat rreth 21 orë dhe përfshin shtatë tragete. Norvegjia synon ta bëjë këtë korridor plotësisht pa tragete, përmes ndërtimit të tuneleve dhe urave, duke përgjysmuar kohën e udhëtimit.
Projekti i përgjithshëm pritet të përfundojë jo përpara vitit 2050.
Rogfast pritet gjithashtu të ndikojë në ekonominë lokale, duke lehtësuar transportin e produkteve të detit, ulur kostot logjistike dhe përmirësuar aksesin në punësim, arsim dhe shërbime publike.
Aktualisht, tuneli Seikan në Japoninë veriore mban rekordin për tunelin më të gjatë me një segment nën det, me gjatësi totale 53,85 kilometra dhe pjesë nënujore 23,3 kilometra.
Tuneli i Kanalit, që lidh Anglinë me Francën, ka gjatësi totale 50,46 kilometra dhe segment nënujor 37,9 kilometra.
Megjithatë, Rogfast do të jetë dukshëm më i thellë, duke arritur 392 metra nën nivelin e detit, kundrejt 240 metrave të Seikanit dhe 115 metrave të tunelit të Kanalit. (A2 Televizion)
A2 CNN Livestream
MUND TE LEXONI GJITHASHTU
