Situata në Liban është përshkallëzuar ndjeshëm, me shkëmbime sulmesh mes Hezbollahut dhe forcave izraelite, ndërsa raportohen viktima, të plagosur dhe dëme të mëdha materiale në disa zona të vendit.
Hezbollahu ka deklaruar se ka kryer një seri sulmesh ndaj pozicioneve izraelite, duke goditur artilerinë e sapo vendosur në qytetin Biyyada me breshëri raketash. Sipas grupit, janë përdorur edhe dronë sulmues për të goditur një dhomë kontrolli zjarri pranë postës Kfar Jaladi, si dhe janë lëshuar raketa drejt vendbanimit Misgav Am.
Nga ana tjetër, sulmet ajrore izraelite kanë goditur disa zona në Liban gjatë ditës. Në Sahmar, në Luginën e Bekaas Perëndimore, tre anëtarë të një familjeje janë vrarë dhe një tjetër është plagosur, ndërsa më shumë se 10 shtëpi janë shkatërruar nga bombardimet që kanë vazhduar deri në orët e para të mëngjesit.
Në jug të vendit, sulme ajrore dhe me dronë kanë goditur disa qytete dhe zona, përfshirë Aytit, Qalaouiyeh dhe rrethinat e Kfar Tebnit, ndërsa në Nabatieh janë raportuar disa incidente të ndara: një sulm ndaj një shtëpie në lagjen Arab Salim ka lënë dy të vrarë dhe një të plagosur, ndërsa më herët dy persona të tjerë u vranë pas një sulmi ndaj një makine në të njëjtën zonë.
Në qytetin Shabriha pranë Tirit, një sulm ajror ka vrarë të paktën një person dhe ka plagosur tre të tjerë, ndërsa një tjetër goditje ka dëmtuar një ndërtesë në Ansariyah pa raportime të menjëhershme për viktima. Gjithashtu, një sulm me dron pranë Nabatieh ka vrarë dy persona.
Më herët gjatë ditës, sulme të tjera ajrore kanë goditur edhe qytetin Aadloun, duke dëmtuar një ndërtesë bashkie dhe duke shkaktuar të plagosur, si dhe një shtëpi në Deir Intar, ku po ashtu janë raportuar viktima dhe të plagosur.
Ndërkohë, në Bafliyeh, një sulm tjetër ajror ka shkaktuar dëme të mëdha në shtëpi dhe të plagosur, ndërsa ekipet e mbrojtjes civile po kërkojnë persona të zhdukur nën rrënoja.
Ky përshkallëzim vjen në një moment të ndjeshëm diplomatik, pasi përfaqësues të Izraelit dhe Libanit pritet të takohen në Uashington, në nivelin më të lartë të bisedimeve mes dy vendeve prej vitesh. (A2 Televizion)
A2 CNN Livestream
MUND TE LEXONI GJITHASHTU
