Konstantinos Tassoulas është emri i shpallur nga kryeministri grek Kyriakos Mitsotakis si kandidati për President i Republikës, për të pasuar Katerina Sakellaropoulou.
Kryeministri e vlerëson maksimalisht politikanin erudit epiriot, i cili po kryen mandatin e dytë si kryetar i Kuvendit. Emri i Tassoulas është përfolur prej muajsh për postin e Presidentit të Republikës , si një zgjedhje që do të vijë nga “zemra” e Demokracisë së Re, megjithëse u zgjodh në verën e vitit 2023 me 249 vota në Kryesinë e Kuvendit.
Ai është një parlamentar i vjetër, i njeh bilancet dhe pritet që të votohet pa problem nga deputetët e Mitsotakis, logjikisht edhe nga ish-kryeministri Antonis Samaras.
Kush është Konstantinos Tassoulas?
Me shumë gjasë Kostas Tassoulas do të jetë Presidenti i 9-të i Republikës duke nisur nga 13 Marsi.
Kryetari aktual i Kuvendit ka lindur në Janinë në vitin 1959, është i martuar me Fani Stathopoulou dhe kanë dy fëmijë.
Ai ka studiuar në Fakultetin Juridik të Universitetit të Athinës dhe ka punuar gjatë periudhës 1988-89 në një studio ligjore në Londër si anëtar i Këshillit Britanik.
U zgjodh për herë të parë deputet në vitin 2000 në qarkun e Janinës me Demokracinë e Re. Ai u rizgjodh në zgjedhjet parlamentare të viteve 2004, 2007, 2009, 2012 (dy herë), 2015 (dy herë), 2019 dhe 2023.
Në vitin 2006 u emërua nga kryeministri i atëhershëm Kostas Karamanlis, zv/Përfaqësues Parlamentar i Demokracisë së Re, ndërsa në vitin 2007 mori detyrën e zv/ministrit të Mbrojtjes Kombëtare. Në shkurt të vitit 2010 u zgjodh Sekretar i Përgjithshëm i Grupit Parlamentar të Demokracisë së Re, ndërsa në vitin 2014 në qeverinë Samaras u emërua ministër i Kulturës dhe Sportit deri në janar 2015.
Në vitin 2018, ai kishte marrë detyrën e Raportuesit të Përgjithshëm të Demokracisë së Re për Rishikimin e Kushtetutës, ndërsa në vitin 2019 u propozua nga kryeministri Kyriakos Mitsotakis për postin e Kryetarit të Kuvendit. Ai u zgjodh kryetar i parlamentit me 283 vota dhe u rizgjodh me 270 në maj 2023 dhe me 249 vota në qershor të po atij viti.
Tassoulas ishte sekretar privat i të ndjerit Evangelos Averof-Tositsa, President Nderi i Partisë Demokratike Kombëtare nga viti 1981 deri në 1990 dhe këshilltar special i Ministrive të Ekonomisë Kombëtare, Tregtisë dhe Bujqësisë (1989-1990).
Ai ishte President i Organizatës për Promovimin e Eksportit (OPE) nga viti 1990 deri në 1993 dhe si këshilltar komunal në Komunën e Kifisisë është zgjedhur në vitin 1990.
Në vitin 1994 u zgjodh kryetar i Komunës së Kifisisë. Në qershor 2013 u emërua President i Institutit të Demokracisë “Konstantinos Karamanlis”.
Tassoulas nuk i përket politikanëve “të zhurmshëm”, megjithëse nuk kalon pa u vënë re kryesisht për humorin e tij flegmatik dhe njohuritë e thella historike e letrare që përdor rregullisht në ndërhyrjet e tij politike. (A2 Televizion)
A2 CNN Livestream
MUND TE LEXONI GJITHASHTU
