Presidenti rus Vladimir Putin tha të enjten se bisedimet e ardhshme për një zgjidhje të luftës në Ukrainë duhet të përqendrohen në garancitë e sigurisë për të dy vendet dhe në një kornizë të përgjithshme për sigurinë në të gjithë Evropën.
Në një intervistë për televizionin rus një ditë pas takimit me të dërguarin presidencial të SHBA-së, Steve Witkoff, Putin konfirmoi se Rusia ishte gati të rifillonte bisedimet e ndërmjetësuara nga SHBA-ja me Ukrainën muajin e ardhshëm.
Ai ripërsëriti se Rusia nuk donte kurrë të niste një luftë, por kishte hasur reagime armiqësore nga Ukraina për çështje kyçe që e shqetësonin Moskën, përcjell A2 CNN.
Bisedimet mbi një sërë çështjesh mund të çojnë në një rezultat pozitiv, tha ai, por Rusia mbeti e vendosur për një zgjidhje që i jep fund konfliktit në vend të një armëpushimi jetëshkurtër.
“Qëllimi i këtyre bisedimeve do të jetë garancia e sigurisë së Ukrainës dhe Rusisë pas arritjes së marrëveshjeve të paqes, në formën e tyre përfundimtare, jo si rezultat i një armëpushimi të përkohshëm për një periudhë të shkurtër kohore. Ne jemi të gatshëm të rifillojmë këto kontakte për të arritur këtë qëllim”, tha Putin, shkruan A2 CNN.
Presidenti rus tha se Witkoff theksoi gjithashtu se diskutimet duhet të shtrihen në "arkitekturën e sigurisë evropiane në tërësi. Dhe unë pajtohem edhe me këtë. Le të shohim se si do të zhvillohen gjërat në ditët në vijim".
Presidenti ukrainas Volodymyr Zelenskiy, i cili u takua me Witkoff në Norvegji të martën, tha se Ukraina ishte gati për bisedime të cilat mund të zhvillohen në fillim të muajit të ardhshëm. Ukraina, tha ai, mbështet "çdo propozim për armëpushim, përfundim të luftës, një armëpushim energjetik, si dhe nisma humanitare".
Përpjekjet e kryesuara nga Shtetet e Bashkuara për të ndjekur bisedimet ngecën në shkurt me shpërthimin e konfliktit SHBA-Izrael me Iranin.
Shumë nga çështjet e luftës në Ukrainë përqendrohen te territori. Rusia kërkon që Ukraina të heqë dorë nga i gjithë rajoni Donbas i Ukrainës lindore. Kievi hedh poshtë çdo ide për të hequr dorë nga toka që mban aktualisht.
(A2 Televizion)
A2 CNN Livestream
MUND TE LEXONI GJITHASHTU
