Papa Françesku, i cili ndërroi jetë të Hënën pas Pashkëve, po thyen traditën lidhur me vendin ku do të prehet – duke zgjedhur një bazilikë të ndriçuar nga drita, në vend të Vatikanit.
Zakonisht, papët varrosen brenda Vatikanit, nën Bazilikën e Shën Pjetrit. Por Françesku do të jetë papa i parë në më shumë se një shekull që do të varroset jashtë Vatikanit, pasi ai kishte kërkuar një varr “të thjeshtë” disa kilometra larg, në Bazilikën e Santa Maria Maggiore.
Ceremonia mortore e Françeskut do të zhvillohet të shtunën në Sheshin e Shën Pjetrit, përpara se trupi i tij të dërgohet në bazilikë - në anën tjetër të lumit, në qendër të Romës - për t’u varrosur.
“Vendi i varrimit duhet të jetë në tokë; i thjeshtë, pa zbukurime të veçanta dhe me vetëm një mbishkrim: Franciscus”, thuhet në testamentin e Papës, të publikuar nga Vatikani. Ai gjithashtu kishte theksuar se shpenzimet e varrimit do të mbuloheshin “nga një shumë e dhuruar nga një bamirës”, shkruan A2 CNN.
Ndërsa varri i Françeskut do të jetë modest, bazilika mbi të shkëlqen me dritë dhe ar. Tavanet janë të mbuluara me dru të artë dhe drita hyn nga dritaret e larta, duke ndriçuar mozaikët e hollësishëm që zbukurojnë navatën. Prej ditës së vdekjes së tij, pelegrinë dhe vizitorë kanë vërshuar drejt bazilikës, për të parë nga afër një vend që ai e donte shumë.
E ndërtuar mbi njërën prej shtatë kodrave të Romës së lashtë, Santa Maria Maggiore është një nga katër bazilikat papnore. Kulla e saj e kambanës është më e larta në kryeqytetin italian, me një lartësi prej 75 metrash, dhe pozicioni i saj në kodër e bën atë pikën më të lartë të qytetit.
Sipas legjendës, Virgjëresha Mari iu shfaq Papës Liberius dhe një aristokrati italian, duke kërkuar që një kishë të ndërtohej në nder të saj, në një vend që do të zbulohej në mënyrë të mrekullueshme. Kodra Esquilino në Romë u identifikua si vendi, pasi ra borë në majën e saj në gusht të vitit 358, në kulmin e verës. Në kohët moderne, më 5 gusht të çdo viti, në bazilikë mbahet një ceremoni që kujton “Mrekullinë e Borës.”
Kisha në formën që e njohim sot u ndërtua me urdhër të Papës Sixtus III në vitin 431. Mozaikët datojnë nga ajo kohë, dhe brendësia gjithashtu përmban kolona klasike të marrë nga ndërtesa të tjera, ndonëse fasada e saj është ndërtuar në stilin neoklasik në shekullin XVIII.
Kjo kishë ka pasur një rëndësi të veçantë për Papa Françeskun, i cili zakonisht e vizitonte çdo mëngjes të diel për të nderuar Virgjëreshën Mari.
Ai shpesh vizitonte bazilikën para dhe pas udhëtimeve jashtë shtetit, si dhe pas shtrimeve në spital, për t’u lutur para ikonës më të rëndësishme mariane, Salus Populi Romani, duke i besuar mbrojtjen e udhëtimeve të tij apostolike, në përputhje me traditën jezuite.
Ky vend ishte veçanërisht i rëndësishëm për të, sepse aty e nisi ditën e tij të parë si lider i Kishës Katolike në vitin 2013. Ishte gjithashtu vendi i parë që vizitoi pas daljes nga spitali muajin e kaluar, duke vendosur lule përpara ikonës së Virgjëreshës para se të kthehej në rezidencën e tij në Vatikan.
Françesku kishte zbuluar planet për t’u varrosur aty në dhjetor 2023, duke shpjeguar se ndjente një “lidhje shumë të fortë” me këtë bazilikë. “Dua të varrosem në Santa Maria Maggiore”, tha ai. “Sepse është përkushtimi im i madh”.
Një “vend tashmë është përgatitur” për varrimin e tij, tha papa në vitin 2023, duke shtuar se kishte punuar për të thjeshtuar ceremonitë mortore papnore.
“Ne i kemi thjeshtuar shumë,” tha Françesku. “Unë do ta provoj ritin e ri,” shtoi me një buzëqeshje në atë kohë.
Megjithëse shtatë papë të tjerë janë varrosur në Santa Maria Maggiore, Françesku do të jetë i pari që nuk do të prehet në Bazilikën e Shën Pjetrit që nga Papa Leo XIII, i cili vdiq në vitin 1903 dhe u varros në Bazilikën e Shën Gjonit. Papa i fundit që u varros në Santa Maria Maggiore ishte Klementi IX, në vitin 1669.
Ky nuk është rasti i vetëm që Papa Françesku ka thyer traditën: ai gjithashtu refuzoi të jetonte në Pallatin Apostolik, rezidencën zyrtare papnore, duke zgjedhur në vend të saj një apartament të vogël në shtëpinë e miqve të Vatikanit, Santa Marta.
Gjatë jetës së tij, ai njihej për shmangien e luksit. Si kardinal në Buenos Aires të Argjentinës, ai përdorte metronë për të udhëtuar, në vend që të përdorte një makinë me shofer. Më vonë, si Papë, ai udhëtonte për të punuar në Vatikan me një Ford Focus të thjeshtë ngjyrë blu.
Një ditë pas vdekjes së tij, Bazilika di Santa Maria Maggiore ishte shumë më e mbushur me njerëz se zakonisht, me qindra vajtues, besimtarë dhe vizitorë. Atmosfera ishte plot ndjenjë, por jo e zymtë, dhe mesha e pasdites nisi me një kuintet frymorësh dhe me muzikë të ndritshme nga organoja. (A2 Televizion)
A2 CNN Livestream
MUND TE LEXONI GJITHASHTU
