Raketa hipersonike e Kinës që mund të rrëzojë "bombarduesin e padukshëm" amerikan

Kina është fuqia e tretë ushtarake në botë, vetëm pas Shteteve të Bashkuara të Amerikës dhe Rusisë. Por, vendi aziatik kryeson si forcë detare. Gjithashtu, ka cilësi kyçe të tilla si kapaciteti i saj industrial dhe ekuilibri midis forcave të saj, me një shumicë pajisjesh moderne në krahasim me atë të epokës së Luftës së Ftohtë.

Midis gjithë kësaj fuqie ushtarake, Ushtria Popullore Çlirimtare Kineze ka disa nga raketat hipersonike më të fuqishme në botë. Pikërisht, një nga këto armë do t'i lejonte Pekinit të rrëzonte bombarduesin e ri të Shteteve të Bashkuara, B-21 Raider, i cili në ditët e para të nëntorit kreu fluturimin e parë eksperimental.

Megjithëse versioni luftarak është i klasifikuar, studiuesit në Universitetin Politeknik Veriperëndimor në Xian kryen një simulim që konfirmon potencialin e tij shkatërrues. Sipas studimit, të udhëhequr nga profesori Chen Sun, Forcat Ajrore Kineze mund të zbulonin dhe të gjuanin raketat hipersonike të lëshuara nga një avion i avancuar.

Sipas Chen, raketat hipersonike të zhvilluara nga Kina kanë karakteristika që u lejojnë atyre të gjurmojnë dhe rrëzojnë aeroplanët “stealth” duke përdorur “motorë impuls” me karburant të ngurtë. Falë kësaj, ata mund të rregullojnë shpejtësinë gjatë fluturimit. Sipas Chen, nëse bombarduesi B-21 zbulon kërcënimin kinez, një tjetër raketë hipersonike mund të sulmojë bombarduesin falë aftësisë së tij për të ndryshuar objektivat.

Bombarduesi “i padukshëm”

Ishte pothuajse një vit më parë kur Amerika prezantoi blerjen e saj të fundit, B-21 Raider, i njohur si “i padukshmi” për aftësinë e tij për të qenë i pazbulueshëm nga radarët dhe “sistemet më të sofistikuara të mbrojtjes”. Një aspekt tjetër që e bën këtë bombardues unik është shpejtësia e tij, pasi mund të fluturojë me 1000 kilometra në orë, pak më poshtë shpejtësisë së zërit.

Sistemi i tij “stealth” është më i avancuar se ai i avionëve të tjerë të Amerikës, si F-35 dhe F-22. Në këtë mënyrë, ai është i aftë të “futet fshehurazi” në territorin e armikut dhe të nisë sulme me bomba dhe raketa, qofshin ato bërthamore apo konvencionale. Përveç kësaj, ai është i aftë të komandojë dronë dhe të mbajë një numër të madh raketash brenda, duke shumëfishuar ndjeshëm kapacitetin e tij luftarak në qiell.

Por, Kina nuk është shumë prapa dhe, sipas Chen, ka zhvilluar avionë me aftësinë për të fikur radarët dhe për të inspektuar mjedisin falë teknologjive të fundit dhe një veshjeje që kap sinjalet elektrike dhe termike nga një objekt në distancë. Në këtë mënyrë, si avioni i ri “stealth”, ashtu edhe dronët e tij mund të fluturojnë më shpejt se bombarduesi i Shteteve të Bashkuara. (A2 Televizion)