Forcat izraelite qëlluan dhe plagosën të paktën një palestinez, hodhën gaz lotsjellës, arrestuan tre persona dhe mbyllën hyrjet për në fshatin Tal, në Bregun Perëndimor të pushtuar, ndërsa më shumë se 100 kolonë izraelitë marshonin drejt fshatit.
Marshimi pasoi një sulm të kolonëve fundjavën e kaluar, i cili la të vdekur gjashtë persona – përfshirë katër palestinezë dhe dy izraelitë – duke nxitur thirrje për masa të ashpra në Bregun Perëndimor nga ana e kolonëve dhe qeverisë izraelite.
Që atëherë, ushtria izraelite ka kryer bastisje dhe arrestime pothuajse çdo ditë në këtë zonë; sipas nënkryetarit të këshillit lokal, Munther Shtayya, të paktën 24 banorë të fshatit Tal ndodhen ende në paraburgim izraelit. Të shtënat e së premtes ndodhën pasi banorët e fshatit Tal u përballën me një grup të madh kolonësh të armatosur, të cilët, sipas tyre, u përpoqën të sulmonin fshatin.
Ushtria izraelite deklaroi se pati një "përplasje të dhunshme" midis dhjetëra palestinezëve dhe civilëve izraelitë, gjatë së cilës u shkëmbyen të shtëna nga të dyja palët.
Qeveria e kryeministrit Netanyahu e ka cilësuar incidentin si akt terrorizmi, ndërsa palestinezët thonë se banorët po mbroheshin nga i radhës në një seri sulmesh të kryera nga kolonët, të cilët synojnë t'i dëbojnë ata nga tokat e tyre.
Incidenti u shndërrua në një pikë të nxehtë tensioni në Bregun Perëndimor, në një kohë kur dhuna e kolonëve po përshkallëzohet dhe kanale të ndryshme në rrjetet sociale, të drejtuara nga kolonët, bëjnë thirrje për hakmarrje.
Mediat izraelite raportuan se kryeministri izraelit Benjamin Netanyahu dhe ministri i Mbrojtjes, Israel Katz, u zotuan të zgjerojnë operacionet ushtarake në Bregun Perëndimor pas këtij sulmi.
Ndërsa marshonin, kolonët vodhën sende nga të paktën një ndërtesë palestineze dhe vandalizuan një varrezë, ndërkohë që ushtria izraelite i ndiqte nga pas. Ushtria izraelite deklaroi se ndodhej në zonë për të shpërndarë kolonët dhe për t'i evakuuar ata prej andej.
Banorët thonë se ushtria ishte e pranishme ndërsa kolonët shkatërronin gurët e varreve. Ushtria izraelite njoftoi se kishte marrë raporte për izraelitë që po vandalizonin një varrezë, por nuk dha detaje të mëtejshme. Ushtria izraelite i mohon këto pretendime. (A2 Televizion)
A2 CNN Livestream
MUND TE LEXONI GJITHASHTU
