Forcat amerikane goditën të martën pesë cisterna iraniane, duke fundosur njërën prej tyre. Sipas Komandës Qendrore të SHBA-së, sulmet erdhën si përgjigje ndaj dy përpjekjeve të Iranit për të goditur një anije luftarake amerikane.
Katër nga cisternat e goditura ndodheshin në Gjirin e Omanit dhe, sipas autoriteteve amerikane, ishin të lidhura me Korpusin e Gardës Revolucionare Islamike të Iranit. Një tjetër anije u godit pranë ishullit Kharg, një prej pikave kryesore të eksportit të naftës së Iranit.
SHBA deklaroi se anijet ishin pjesë e një rrjeti të fshehtë shumë-miliardësh që, sipas SHBA-së, financon Gardën Revolucionare dhe grupet aleate të Iranit në rajon, shkruan A2.
Irani reagoi duke lëshuar raketa drejt një baze amerikane në Jordani. Autoritetet jordaneze thanë se 18 nga 20 raketat u interceptuan, ndërsa dy të tjera ranë në zona të pabanuara.
Ndërkohë, Garda Revolucionare iraniane deklaroi se kishte sulmuar dy anije amerikane, tetë cisterna nafte dhe 10 anije të tjera që, sipas saj, nuk iu bindën paralajmërimeve për kalim në Ngushticën e Hormuzit.
Në të njëjtën kohë, tensionet janë përhapur edhe në vende të tjera të rajonit. Të martën, rebelët Houthi të mbështetur nga Irani sulmuan objekte energjetike dhe infrastrukturë civile në Arabinë Saudite. Autoritetet saudite thanë se 73 persona u plagosën dhe se sulmet shkaktuan zjarre në disa instalime të naftës, duke detyruar përkohësisht ndërprerjen e operacioneve.
Përshkallëzimi erdhi disa orë pasi marina iraniane pretendoi se kishte kapur një nëndetëse pa ekuipazh amerikane në Ngushticën e Hormuzit. Një zëdhënës amerikan sqaroi se mjeti ishte një dron nënujor që kishte pësuar një defekt më shumë se një ditë më parë dhe po përdorej për monitorimin e ujërave të rajonit.
Sipas SHBA-së, droni ishte një model i vjetër, nuk kishte mbledhur të dhëna të ndjeshme dhe nuk mbante pajisje të klasifikuara sonar ose radar. (A2 Televizion)
A2 CNN Livestream
MUND TE LEXONI GJITHASHTU
