Sekretari i Përgjithshëm i NATO-s, Mark Rutte, tha se aleanca ushtarake po diskuton me vendet aleate për mënyrat se si do të rihapin Ngushticën e Hormuzit.
Në një deklaratë për mediat në Norvegji të mërkurën, Rutte tha se ngushtica është tepër e rëndësishme dhe duhet të hapet sa më shpejt të jetë e mundur.
“Të gjithë biem dakord, sigurisht, që ngushtica duhet të rihapet. Dhe di që aleatët po punojnë bashkë, po diskutojnë sesi do ta bëjmë këtë, cila është mënyra më e mirë për ta bërë”, tha Rutte, përcjell A2 CNN. “Po punojnë bashkërisht për të gjetur një rrugëzgjidhje”.
Presidenti amerikan, Donald Trump, kritikoi disa shtete anëtare të NATO-s në fillim të javës pasi ato refuzuan kërkesën e tij për të dërguar anije luftarake në Hormuz, për të shoqëruar naftëmbajtëset.
Çfarë po ndodh me luftën?
• Izraeli thotë se ka vrarë ministrin e Inteligjencës së Iranit, Esmail Khatib, në një sulm të martën, në goditjen më të fundit ndaj drejtuesve të lartë të vendit. Njoftimi vjen një ditë pas vrasjes së shefit të sigurisë së Iranit, Ali Larijani. Teherani është zotuar për hakmarrje për vrasjen e Larijanit.
• Pjesë të rezervave të naftës dhe gazit natyror në Iran janë sulmuar nga SHBA dhe Izraeli, raportojnë mediat shtetërore. Ndërkohë, SHBA raportohet të ketë hedhur 2500 kg bomba për të depërtuar në bazat e raketave përgjatë Ngushticës së Hormuzit. Izraeli tha se ka interceptuar raketa iraniane, ndërsa disa lagje në Liban u goditën nga sulme të reja izraelite.
• Presidenti amerikan Donald Trump sugjeroi sot se aleatët e SHBA-së duhet të marrin të gjithë përgjegjësinë për patrullimin e Ngushticës së Hormuzit nëse SHBA shkakton rrëzimin e regjimit iranian. Vendet europiane kanë refuzuar kërkesat e tij për të dërguar anije luftarake në këtë rrugë të rëndësishme detare në Lindjen e Mesme. (A2 Televizion)
A2 CNN Livestream
MUND TE LEXONI GJITHASHTU
