Një zjarr i fuqishëm në një fabrikë industriale në rajonin e Ryazanit, rreth 250 kilometra në juglindje të Moskës, shkaktoi vdekjen e 11 personave dhe plagosjen e 130 të tjerëve.
Ngjarja ndodhi në kompleksin industrial “Elastik”, në Shilovsky, ku një punishte baruti u përfshi nga flakët, duke shkaktuar një shpërthim të madh.
Ekipet e kërkim-shpëtimit punuan pa ndërprerje për të lokalizuar të mbijetuarit, ndërkohë, 29 persona mbeten të shtruar në spitale, përfshirë të plagosur në gjendje të rëndë që u transportuan drejt qendrave mjekësore në Moskë.
Autoritetet lokale konfirmuan se tre vetë u shpëtuan nga rrënojat, ndërsa është hapur një hetim për të përcaktuar shkaqet e zjarrit. Për të nderuar viktimat, rajoni i Ryazanit ka shpallur ditë zie. Flamujt janë ulur në gjysmështizë dhe të gjitha aktivitetet argëtuese publike janë anuluar.
Kjo është hera e dytë brenda katër viteve që fabrika “Elastik” përballet me një shpërthim vdekjeprurës, duke ngritur sërish shqetësime mbi sigurinë në sektorin industrial të rajonit.
(A2 Televizion)
A2 CNN Livestream
MUND TE LEXONI GJITHASHTU
