Trump: Lufta në Ukrainë mund të përshkallëzohet

Lufta midis Ukrainës dhe Rusisë mund të përshkallëzohet. Është ky parashikimi i zymtë i Presidentit të zgjedhur të Shteteve të Bashkuara, Donald Trump, në një konferencë të tij në rezidencën e Mar a Lago në Florida.

Trump kritikoi taktikat e negociatave të Presidentit Joe Biden me Ukrainën gjatë fjalimeve në Mar-a-Lago, duke paralajmëruar se lufta "mund të përshkallëzohet".

"Ajo luftë mund të përshkallëzohet dhe të jetë shumë më e keqe se sa është tani. Kjo është një luftë që nuk duhet të kishte ndodhur kurrë. Ju garantoj, nëse do të isha President, ajo luftë nuk do të kishte ndodhur kurrë. Çdo gjë filloi me Joe Biden. Rusia pa të afrohej NATO në pragun e saj. Unë mund të kuptoja ndjenjat e tyre për këtë. Duke negociuar, thashë, do të përfundoni në një luftë dhe doli të jetë një luftë shumë e keqe dhe ajo mund të përshkallëzohet shumë më keq sesa është tani”, deklaroi Trump, shkruan A2.

Në lidhje me situatën në Lindjen e Mesme, Trump ishte akoma edhe më i ashpër. Këtë herë në shënjestër është Gaza dhe Hamasi. Donald Trump paralajmëroi se nëse pengjet që ende mbahen në Gaza nuk lirohen deri në kohën e inaugurimit të tij më 20 janar, "i gjithë ferri do të shpërthejë në Lindjen e Mesme": “Nuk do të jetë mirë për Hamasin dhe nuk do të jetë mirë, sinqerisht, për askënd. I gjithë ferri do të shpërthejë. Nuk kam pse të them më, por kjo është ajo që është. Sulmi i 7 tetorit nuk duhej të kishte ndodhur kurrë”.

Ndërkohë, Trump premtoi ndryshimin e emërtimit të Gjirit të Meksikës: “Ne do të ndryshojmë emrin e Gjirit të Meksikës në Gjirin e Amerikës, i cili ka një unazë të bukur. Kjo mbulon shumë territor, Gjirin e Amerikës - sa emër i bukur. Dhe është e përshtatshme”.

Trump përsëriti thirrjen e tij për Meksikën që të ndihmojë në ndalimin e imigracionit të paligjshëm përtej kufirit SHBA-Meksikë dhe premtimin e tij për të vendosur tarifa ndaj Meksikës.

Sakaq, Donald Trump, nuk e ka përjashtuar mundësinë e përdorimit të ushtrisë për të fituar kontrollin e Kanalit të Panamasë ose të Grenlandës. I pyetur nga një gazetar nëse ai mund ta siguronte botën se nuk do të përdorte shtrëngim ushtarak apo ekonomik, Trump tha: "Jo, nuk mund ta siguroj një gjë të tillë”.  (A2 Televizion)