Shtetet e Bashkuara po konsiderojnë mundësinë e përfshirjes ushtarake në luftën mes Izraelit dhe Iranit, duke iu bashkuar sulmeve ndaj këtij të fundit. Presidenti amerikan kërcënoi hapur Ajatollahun Ali Khamenei se mund ta vrasë në çdo moment, ndërsa lideri suprem u kundërpërgjigj se beteja fillon tani, raporton A2 CNN.
Këshilli i Sigurimit i Kombeve të Bashkuara do të mbajë një tjetër takim urgjent mbi Iranin të premten në Nju Jork. Takimi vjen me kërkesë të Iranit, të mbështetur nga Kina, Pakistani dhe Rusia. Ky do të jetë takimi i dytë, pas një takimi të parë urgjent të premten e kaluar.
Gjatë komenteve të tij sot, Trump tha se Irani duhet të kishte bërë më shumë për të negociuar një marrëveshje me SHBA-në mbi programin e tij bërthamor. “Ata duhet të kishin bërë një marrëveshje”, tha Trump. “Në fund vendosën të mos e bënin”. Më herët sot ai u tha gazetarëve në oborrin e Shtëpisë së Bardhë: “Pse nuk negocioi Irani me mua më parë, gjithë këto vdekje dhe shkatërrime? Pse nuk negocioi Irani?”.
Irani ishte paraqitur në takimet negociuese rreth programit të tij bërthamor para sulmeve të Izraelit të premten, dhe bisedime të mëtejshme midis Iranit dhe Shteteve të Bashkuara ishin planifikuar për të dielën, shkruan A2 CNN. Teherani u tërhoq nga bisedimet pasi filloi sulmi dhe ka refuzuar të riangazhohet ndërsa sulmet vazhdojnë.
Ndërkohë Universiteti i Tel Avivit dhe Universiteti Hebraik kanë kryer një sondazh për të parë se si ndihen izraelitët për këtë luftë. 83% e hebrenjve izraelitë mbështesin sulmet e Izraelit ndaj Iranit. Në zonat ku mbështetja për qeverinë është e lartë, ata që duan luftën e lidhin këtë me ndalimin e Iranit për të zhvilluar armë bërthamore. Të tjerë ishin kundër luftës. Një përqindje e të intervistuarve përmendin shqetësimet se po tërhiqet vëmendja globale larg njerëzve që vuajnë në Gaza dhe kërkojnë që kombet e tjera të ndalojnë armatosjen e Izraelit. (A2 Televizion)
A2 CNN Livestream
MUND TE LEXONI GJITHASHTU
