Një hetim nga Al Jazeera dhe Liberty Investigates ka zbuluar se 12 universitete në Mbretërinë e Bashkuar kanë paguar kompaninë private Horus Security Consultancy për të monitoruar aktivitetet e studentëve dhe akademikëve, veçanërisht ata që mbështesin Palestinën. Kompania ka analizuar postime në rrjete sociale dhe ka përgatitur raporte të përditshme mbi protestat, duke përdorur burime publike dhe teknologji me inteligjencë artificiale. Që nga viti 2022, universitetet kanë shpenzuar mbi 440 mijë paund për këto shërbime.
Ndër rastet e zbuluara është monitorimi i një studenteje doktorature në London School of Economics, postimi i së cilës në rrjete sociale u përfshi në raportet e sigurisë, si dhe një vlerësim “rreziku” për një akademike palestineze të ftuar për ligjëratë në Manchester Metropolitan University. Në disa raste, universitetet kanë kërkuar edhe monitorim specifik për grupe protestuese, përfshirë ato pro-palestineze dhe aktivistë të tjerë.
Universitetet e përfshira thonë se këto shërbime përdoren për të garantuar sigurinë dhe për të parashikuar protesta të mundshme, duke u bazuar vetëm në informacione publike, dhe mohojnë se bëhet fjalë për survejim të drejtpërdrejtë të individëve apo shtypje të aktivizmit.
Disa nga universitetet e përfshira janë:
University of Oxford
Imperial College London
University College London (UCL)
King’s College London (KCL)
University of Sheffield
University of Leicester
University of Nottingham
Cardiff Metropolitan University
Manchester Metropolitan University
London School of Economics (LSE)
University of Bristol
Megjithatë, kritikët, përfshirë sindikata dhe ekspertë të OKB-së, shprehin shqetësime serioze ligjore dhe etike. Ata theksojnë se mbledhja dhe analizimi i të dhënave të studentëve në këtë mënyrë mund të cenojë privatësinë dhe lirinë e shprehjes, si dhe të krijojë një klimë frike. Disa studentë raportojnë stres dhe presion psikologjik, ndërsa të tjerë janë tërhequr nga aktivizmi si pasojë e këtij survejimi. (A2 Televizion)
A2 CNN Livestream
MUND TE LEXONI GJITHASHTU
