Marrëveshja e armëpushimit mes Izraelit dhe Hezbollahut ka bërë që qindra banorë të rikthehen në shtëpitë e tyre. Marrëveshja e armëpushimit Izrael-Hezbollah, e cila hyri në fuqi në orën 4 të mëngjesit të së mërkurës me kohën lokale, pas një marrëveshjeje të ndërmjetësuar nga SHBA-ja dhe Franca, është pritur me reagime të ndryshme nga qytetarët në Izrael. Disa kanë shprehur optimizëm për një ndërprerje të dhunës, ndërsa të tjerë mbeten skeptikë nëse marrëveshja do të mbahet.
Duke folur për Reuters, një banor i Jerusalemit tha se shpresonte se kjo nënkuptonte se miqtë e tij që jetonin në Izraelin verior mund të ktheheshin në shtëpi, duke theksuar gjithashtu aftësitë ushtarake të Izraelit.
“Shpresoj se kjo situate e re do të jetë e mirë për Izraelin dhe për të gjithë Lindjen e Mesme. Por kur shikoni në të kaluarën, shihni se ndonjëherë është shumë problematike dhe armiqtë tanë po bëjnë gjithçka për të shkatërruar vendin tonë”, tha Benny Weill.
Vendasit në qytetin verior të Izraelit, Nahariya, pranë kufirit me Libanin, ishin më pak të kënaqur me armëpushimin, madje shprehën zemërimin ndaj kryeministrit izraelit Benjamin Netanyahu për përfundimin e luftimeve, të cilat ata i shohin si të parakohshme.
“Çfarë të them? Se është shumë keq, vërtet keq. Ata nuk bënë asgjë dhe ushtarët tanë u tretën për asgjë. Bibi (Netanyahu) duhet të largohet shpejt nga qeveria, edhe pse unë e mbështeta atë”, tha Levana Karsenti, banore izraelite.
Armëpushim midis Izraelit dhe grupit të armatosur libanez Hezbollah u mbajt të mërkurën pasi të dyja palët pranuan një marrëveshje të ndërmjetësuar nga SHBA dhe Franca, një fitore e rrallë për diplomacinë në Lindjen e Mesme të shkatërruar nga dy luftëra për më shumë se një vit. Ushtria e Libanit, e ngarkuar me sigurimin e zgjatjes së armëpushimit, tha se po përgatitej të vendoste në jug të vendit, një rajon që Izraeli e bombardoi rëndë në betejën e tij kundër grupit militant të mbështetur nga Irani, së bashku me qytetet dhe qytezat lindore dhe bastionet e Hezbollahut në periferitë jugore të Bejrutit. (A2 Televizion)
A2 CNN Livestream
MUND TE LEXONI GJITHASHTU
