Nga qyteti Tyre, gazetarja Heidi Pett raportoi se Ministria e Shëndetësisë e Libanit ka konfirmuar se katër persona janë vrarë në dy sulme në fshatin Yahmor al-Shaqif, në rrethin Nabatieh.
Ky rajon ndodhet në veri të lumit Litani, por nuk bën pjesë në të ashtuquajturën “Vija e Verdhë”, një zonë kufizuese që sipas raportimeve Izraeli e ka shpallur në mënyrë të njëanshme si zonë të kontrolluar në jug të Libanit.
Deri tani nuk ka konfirmim për identitetin e personave të vrarë, por kjo ngjarje shihet si pjesë e një modeli të vazhdueshëm aktiviteti ushtarak izraelit, pavarësisht armëpushimit në fuqi.
Gazetarët në terren raportojnë gjithashtu se gjatë gjithë mëngjesit janë dëgjuar shpërthime në jug të Libanit, ndërsa sipas tyre, forcat izraelite po shembin shtëpi dhe ndërtesa në zona të ndryshme.
Shembjet janë raportuar në Naqoura, në pjesën lindore të kufirit, si dhe në qytetin Bint Jbeil, në pjesën qendrore të zonës kufitare.
Sipas raportimit, Izraeli ka vazhduar aktivitetin ushtarak përgjatë gjithë vijës kufitare dhe brenda zonës së “Vijës së Verdhë” që vetë e ka përcaktuar njëanshmërisht.
Në orët e para të mëngjesit, Izraeli gjithashtu ka goditur disa lokacione më në veri të kësaj vije, të cilat sipas ushtrisë izraelite po përdoreshin nga grupi Hezbollah për lëshimin e raketave. (A2 Televizion)
A2 CNN Livestream
MUND TE LEXONI GJITHASHTU
