Ndërsa të ftuarit me fustane mbrëmjeje dhe smoking vallëzonin në sallën madhështore të Mar-a-Lagos në Palm Beach, Florida, të premten në mbrëmje, në një pjesë tjetër të pronës po zhvillohej një takim, që do të ndryshonte balancat në Lindjen e Mesme. Zyrtarët më të lartë të sigurisë kombëtare të SHBA-së po mblidheshin në pritje të një nate të gjatë.
Drejtori i CIA-s, sekretari i shtetit dhe sekretari i mbrojtjes kishin hyrë më herët pa u vënë re nga të ftuarit që pinin kokteje pranë pishinës. Po ashtu ishte edhe kryetari i Shefave të Shtabit të Përbashkët, i cili kishte vendosur në një këmbalec një hartë të Lindjes së Mesme me pozicionet e aseteve amerikane dhe objektivave iraniane.
Kur Presidenti Donald Trump mbërriti, ambienti ishte kthyer në një “Situation Room” të improvizuar, nga ku ai do të mbikëqyrte nisjen e një sulmi të vazhdueshëm kundër Iranit. Para se të tërhiqej pas perdes, ai iu drejtua shkurtimisht të pranishmëve në mbrëmjen bamirëse: “Kalofshi bukur të gjithë… Duhet të shkoj në punë”.
Fotot e publikuara nga Shtëpia e Bardhë e tregojnë Trump pa kravatë, me një kapele të bardhë me mbishkrimin “USA”, duke ndjekur zhvillimet që do të përfshinin edhe vrasjen e Udhëheqësit Suprem të Iranit, Ajatollah Ali Khamenei, si dhe njoftimin për vdekjen e tre ushtarakëve amerikanë. Ai nuk mbajti një fjalim të drejtpërdrejtë apo konferencë për shtyp, duke lënë publikun vetëm me imazhe dhe dy video të regjistruara.
Përdorimi i Mar-a-Lago-s për operacione kaq të ndjeshme ka shkaktuar shqetësime të vazhdueshme për sigurinë. Një fotografi ku shefja e stafit, Susie Wiles, shihej me një orë inteligjente në dorë nxiti spekulime në internet, por prodhuesi sqaroi se pajisja nuk ka mikrofon, GPS apo lidhje celulare dhe është e miratuar nga NSA si pajisje personale.
Kjo nuk është hera e parë që Trump përdor klubin për vendime madhore ushtarake. Në vitin 2020 ai mori aty vendimin për eliminimin e komandantit iranian Qasem Soleimani. Në 2017 autorizoi sulme ndaj Sirisë për përdorimin e armëve kimike, përpara se të rikthehej në darkë me presidentin kinez Xi Jinping. Gjatë vitit të fundit, nga Mar-a-Lago janë mbikëqyrur edhe operacione kundër rebelëve Houthi në Jemen, sulme ndaj objektivave të dyshuara të ISIS në Nigeri dhe misioni për kapjen e Nicolás Maduro në Venezuelë.
Klubi, i ndërtuar në vitet 1920 nga trashëgimtarja Marjorie Merriweather Post, ka mbrojtje të fortifikuara, përfshirë snajperë, qen zbulues dhe patrullime ujore. Megjithatë, muajin e kaluar një person i armatosur depërtoi në perimetrin e sigurisë para se të neutralizohej nga autoritetet. Pas nisjes së operacionit kundër Iranit, Shërbimi Sekret njoftoi forcim të mëtejshëm të masave të sigurisë. (A2 Televizion)
A2 CNN Livestream
MUND TE LEXONI GJITHASHTU
